Segun Eduard Pieters, parlamentario di fraccion di PPA, el a indica cu e famoso “Exit-bepaling”, no ta suficiente ni ta duna niun garantia pa protega nos autonomia. E asina yama horizon-bepaling den e ley di HOFA, cu ta presenta como un salida, en realidad ta un mecanismo huridico pa kita Aruba su autodeterminacion y autonomia. Unabes cu Aruba haya e Rijkswet HOFA, p’e yega na por ehempel un leenfaciliteit, Aruba mester cumpli cu varios exigencia di e lista di e 20 exigencianan, cu ta pone nos den un posicion dependiente, hopi fragil y debil. Ni papia mes di sali for di e Consensus Rijkswet HOFA caminda mester cumpli cu tur 20 exigencia pa 3 aña consecutivamente. Ta manera e letra di e cancion di Hotel California” You can check out anytime you like, but you can never leave“.
Algun articulo hopi subhetivo
Eduard Pieters a señala su preocupacion basa riba e contenido di e ley di HOFA, unda cu mustra mas di ta un arma silencioso di interpretacion y poder. “Pa mi djis duna un ehempel, den e articulo 5, inciso 6, tin skirbi tocante e “risico-paragraaf” cu ta obliga Aruba pa describi “de aard, de financiële impact en de kans dat risico’s zich voordoen.” Pero nada no ta transparente y e forma con nan ta formula, ta laga hopi espacio pa wega di poder. Kico exactamente nan ta referi cu “aard”? Cuanto, ki tipo exactamente di impacto financiero ta basta? Cua riesgo ta conta? E falta di definicion ta crea un espacio hopi peligroso pa Den Haag interpreta, segun nan gusto politico.
PPA ta defende claridad, no condicion subhetivo y control
E ambiguidad den e articulonan ta habri porta pa manipulacion, posponiendo nos autonomia y compromete nos dignidad nacional. P’esey, fraccion di PPA ta rechaza categoricamente e Consensus Rijkswet HOFA, cu ta un ley cu ta basa riba interpretacion y no riba respet mutuo. “Den e siguiente reunion publico lo haci mas pregunta na gobierno tocante e contenido di e Consensus Rijkswet HOFA pa pueblo scucha con bruha gobierno ta riba e topico aki” Sr. Pieters ta finalisa.
Press release: PPA