Fraccion di PPA ta sigui señala e retonan cu tin na San Nicolas cu e infrastructura y asina gobierno duna atencion pa drecha e situacion deplorabel situacion aki, particularmente riba e plenchi di Santa Teresita. Desde luna di juli, fraccion di PPA a ricibi un ola di yamada y keho di e habitantenan cu ta cansa di warda y di mira “patchwork” so, cu ta dura algun luna y despues ta bira buraco atrobe. Pueblo ta cansa: San Nicolas merece un solucion definitivo, no un parche temporario.
Mocion di maart rechasa
Durante tratamento di e presupuesto den luna di maart, PPA a presenta un mocion cu ta boga y urgi gobierno pa pone luz den e cayanan cu tin mas necesidad, drecha e aceranan yena cu yerba, instala luz riba caminda pa hotel Secrets pa proteccion di habitantenan, trahadornan y turistanan y pone mihor borchi di indicacion pa yega na e hotel y haci varios area limpi.
E mocion tabata cla: e infraestructura ta parti di seguridad, bienestar y orguyo pa pueblo di San Nicolas.
Plenchi di Santa Teresita: un simbolo di negligencia
Den luna di juli, PPA a sali riba tereno pa mustra e situacion di e plenchi na Teresita. “Nos a indica cu tabata un periodo ideal pa traha: scol tabata cera, asina no lo molestia e muchanan cu zonido y holor di asfalt. Pero lamentablemente no a haci e trabou. Awe nos por mira, cu scol a cuminsa, nan a tapa buraconan cu asfalt. E resultadonan? Nos sa caba: den un luna e mesun buraco ta drecha pa bira un peliger di mas.
Esaki ta lamentabel, paso den e presupuesto di 2025, supuestamente gobierno anterior a aloca fondo pa drecha e plenchi aki completamente.
Mocion di sombra: politica cu ta costa pueblo
“Dia 20 di augustus, un parlamentario di AVP di San Nicolas, sra. Tomasia, a presenta un mocion cu tabata esencialmente un “mocion di sombra” di esun cu PPA a presenta na maart. PPA, a traves di Otmar Oduber, a vota pro, pasobra nos principio ta cla: nos ta sostene tur loke ta bon pa pueblo, sin importa cua partido ta trece e iniciativa,” Eduard Pieters a subraya.
Ta di lamenta cu e madurez politico ey, lamentablemente no ta bin for di e coleganan di parlamento, cu mester ta para pa bienestar y interes di pueblo en general y no di nan partido di coalicion so. Y esaki ta un actitud cu constantemente nos ta mirando, unda cu e mocionnan di fraccion di PPA ta rechaso so ta hayando y despues e partidonan di coalicion ta copia y presenta como si tabata un idea di oposicion. Esaki ta un falta di seriedad cu ta costa pueblo hopi caro y ta lanta pregunta: Ki ta mas importante pa AVP, progreso di Aruba of un show politico?
Urgencia pa infrastructura digno
Ta remarcabel cu Minister di Enseñansa tabata presente pa inaugura un biblioteca bunita na Scol Basico Santa Teresita. Pero pa yega eynan a core tapa e buraconan di asfalt net unda e auto ta pasa. Esaki ta un muestra cla, cu infrastructura ta haya parcialmente atencion, solamente si e ministernan bin pariba pa haci propaganda. Esey no ta respet pa pueblo di San Nicolas.
“Si ta asina, cu a tapa buraco pasobra un minister a bay bishita scol, PPA ta invita gobierno completo, bay cu henter conseho di minister e ora pa San Nicolas, ya asina kisas e pleinchi di Sta Teresita ta haya haya un capa nobo di asfalt, e cayanan, e aceranan, e caminda pa Secrets y hopi mas lo por haya atencion.
Eduard Pieters a conclui:“San Nicolas no ta un area djis pa traha show politico. San Nicolas ta un districto cu pueblo orguyoso y cu ta merece mesun nivel di respet y infrastructura cu cualkier otro parti di Aruba. PPA lo sigui defende e pueblo, sigui pidi transparencia y sigui exigi solucion real.”
