Den un momentu crucial pa futuro di nos pais, lider di fraccion di PPA, Otmar Oduber, hunto cu fractiemedewerker Eduard Pieters, a reuni cu sindicato SIMAR pa trata dos tema vital: Rijkswet HOFA y restructuracion salarial di nos maestronan. Pa PPA, esaki no ta solamente un discusion tecnico, sino un cuestion di democracia, transparencia y respet pa pueblo. Eduard Pieters a enfatisa cu sin informacion cla, ningun decision no por tin balor real. P’esey ta importante pa sinta cu SIMAR tambe pa comparti tur detaye tocante e rijkswet, manera cu a haci cu e otro sindicatonan. E reunion a mustra claramente cu e lucha di PPA ta pa defende tanto e derecho di nos educadornan como autonomia di Aruba.
Importancia pa sinta cu tur gremio
Segun Eduard Pieters, fraccion di PPA tabata prome pa sinta cu tur e gremionan comercial y sindical, pa duna informacion tocante di e proceso di Rijkswet y con esaki ta canando. “Manera nos tur sa, tin un rijkswet HOFA riba mesa y nos di fraccion di PPA a haya hopi importante pa combina e dos topiconan aki y hiba un combersacion relevante cu SIMAR. Pa nos sorpresa, SIMAR tampoco no tabatin tur informacion di Rijkswet, specialmente e contenido. Ta pinta e panorama di HOFA hopi bunita y lucrativo, pero e detayenan niun politico ta of kier papia di dje y kico esaki ta bay haci cu nos autodeterminacio,” Eduard a elabora.
Proceso di Rijkswet
Banda di esey Eduard a splica SIMAR tocante e proceso pa yega na un Rijkswet, unda cu tabatin palabracion por escrito haci na IPKO di 2022. “E lista di acuerdonan cu Aruba y e otro paisnan tabatin den Reino Hulandes, ta Gobierno di Aruba mes no a respeta esaki. Mas tristo ta cu tin 3 minister actual, cu tabata den e funcion di parlamentario na 2022, cu a bay di e acuerdo cu e lista di palabracion haci y a firma e documento aki tambe. Pero awor a opta conscientemente pa bypass Parlamento, como e organo di mas halto na Aruba.” Segun Eduard Pieters loke ta mas preocupante y cuestionabel ainda pa fraccion di PPA ta, cu tin un concepto di rijkswet entrega na Conseho di Minister na Hulanda, cu a wordo aproba. Pero pa colmo ta trata di un Conseho di Minister cu tin a penas 20% di sosten di Tweede Kamer na Hulanda, paso nan ta en espera di un eleccion dia 29 di october proximo.
Finalmente Eduard Pieters ta gradici e representantenan di SIMAR pa a hiba un combersacion hopi ameno y habri, unda ambos partido por a haci e preguntanan relevante, pa despues SIMAR hiba tur informacion bek na su miembronan. “Nos como PPA a haci apelacion grandi na e sindicato aki tambe, mescos cu e otro sindicatonan, pa nan uni y sali como un frente, pidiendo pa mas informacion y sinta cu gobierno tocante e situacion aki. Nos a wak cu Prome Minister ta papia hopi facil cu e rijkswet ta cla caba. Pero kico esaki ta nifica e ora pa e trahadornan di sector publico y priva? Paso un rijkswet tin influencia riba tur ciudadano y sigur pa loke ta trata e sector laboral”, Eduard Pieters a finalisa bisando.