Durante e reunion cu SIMAR, fractiemedewerker y miembro activo di PPA, Eduard Pieters, a enfatisa cu e topico di restructuracion salarial no ta un topico di discusion di awor, sino uno cu ta un proceso eterno y historico. E lucha aki sigur a cuminsa na haya atencion den e ultimo añanan, unda cu for di 2023 un comision di profesional a bin cu un proposicion riba mesa y a negosha cu comision di e gobierno anterior. Sinembargo despues di algun tempo, SIMAR no a tende nada mas y tur cos a bolbe bay den silencio.
A duna espacio
Segun Eduard: “SIMAR a duna gobierno espacio e tempo ey, cual tabata algo hopi bon di nan parti, pa asina gobierno studia e proposicion riba mesa. Pero SIMAR no a haya reaccion nunca mas riba nan peticionnan. Esaki ta algo hopi grave, paso no ta un lucha di awor, ta for di tempo di gobernacion di AVP, despues MEP-RAIZ y awor encabesa atrobe pa AVP-FUTURO.”
Eduard ta di opinion cu gobierno y parlamento semper mester duna respet na sindicato, gremio, instancia, fundacion y/of organisacion. Specialmente si mira con na comienso di tur gobernacion, ta sinta cu nan pa haya sa nan preocupacionnan.
Les di 2008
Historia ta siña nos, pa no ripiti e mesun erornan di pasado y esey mes ta loke mester preveni awor. “Si nos tur por corda bon, tabata na 2008, unda tabatin un manifestacion grandi pa 7-8 siman largo, unda e maestronan a sali pa nan derecho. Nos no por lubida esaki paso e tempo ey, e accion aki a influencia e eleccion na 2009. Tabata un manifestacion grandi, caminda a ocasiona cu e gobierno na mando a cay pisa den e eleccion. Y mi no ta kere cu esaki mester ripiti,” Eduard a enfatisa.
Compromiso di PPA
Eduard Pieters como miembro activo di PPA y lider di fraccion, Otmar Oduber, a compromete cu Simar, unda PPA lo bay pidi un vragen-uur riba e topico aki. PPA lo sigui lucha y vigila di cerca e situacion aki. “Nos ta bay haci pregunta tambe como fraccion y nos ta keda cu speransa cu nan lo bay contesta nos tambe, ya cu 1of 2 minister so ta contesta e preguntanan, di e otronan nos no ta tende ni haya nada bek.”
Finalmente fraccion di PPA a compronde di SIMAR cu nan lo sinta cu gobierno otro siman y nan a invita nan miembronan tambe pa bay bestuurskantoor pa nan por haya informacion di biaha di kico a pasa cu e reunion. “Pues nos di PPA ta sostene y e canalnan ta habri y den Parlamento, PPA tin e posicion pa haci pregunta y yama e minister en cuestion pa bin responsabilisa su mes, tur esaki na bienestar di e maestronan y specialmente nos muchanan, paso nan merece tambe. Paso un maestro contento ta un mucha mas contento den e klas,” Eduard Pieters a finalisa bisando.
