Nicole Peiliker ta representando Boneiru na Thailandia durante e kompetensia di Miss Universo. Komo mama di kuater yu i e kandidata di mas grandi den e edishon aki ku kuarentidos aña, e ta markando historia pa Boneiru i demostrando ku forsa, perseveransia, i ku bunitesa ta eksistí den tur etapa di bida.
Den e último simannan, Nicole a partisipá na vários aktividat manera seshonnan di portrèt, aktividatnan kultural, desfilenan di moda, i e presentashon di e trahe nashonal. E trahe aki ta inspirá pa e bida marino di Boneiru i a haña hopi bon akohida. E kolónan i detayenan a trese e bunitesa di nos laman na bida.
Entidat Públiko Boneiru ta hasi un yamada na komunidat pa sigui sostené Nicole kende orguyosamente ta representá Boneiru. Nos ta felisit’é pa su dedikashon i su impakto positivo riba e esenario mundial. E final di Miss Universo lo tuma lugá dia 20 di novèmber 2025, 8:00 PM (ora di Boneiru). Por wak esaki riba Telemundo TV òf ‘live’ riba YouTube riba GrandTv.
Press release: Gobièrnu di Boneiru
