Despues cu dos siman pasa e organisadonan di e ‘Bright Summer Festival’ a anuncia e artista di momento KAPO como un di e atraccionan principal pa e festival nobo, awe ta anuncia un atraccion mas. Ta trata aki di e famoso banda legendario di reggae Spaño Cultura Profetica.
E banda lo ta riba e escenario diasabra dia 9 di augustus 2025 na Bushiri Beach. Cultura Profetica a wordo estableci na aña 1996 y a graba cinco album den studio y uno live. E live aki tabata un tributo na Bob Marley. E banda tin exitonan hopi conoci manera Saca, Prenda y Sorprende, La Espera, Ilegal, La Complicidad y hopi mas. Tambe nan tin e cover di ‘Sin Ti’ originalmente di King Chango. Durante e di 21 entrega di premionan Grammy, nan a gana e Grammy pa ‘Mejor Album de Musica Alternativa.’ Nan musica ta conoci pa ta un fusion di reggae, jazz y ritmonan Caribense. Nan letranan tambe ta algo cu hopi fanatico ta gusta mirando cu nan letranan hopi biaha ta pa conscientisa mundo riba asuntonan importante cu ta pasa rond mundo y den bida.
Bright Summer Festival ta un festival nobo organisa pa Pelican Pier, Elite Empire Entertainment y Infinity Media Events. E inspiracion a sali for di e famoso evento ‘Bright Summer Session’ pa asina expande e evento pa un festival di dos dia. Diasabra dia 9 di augustus lo tin e concierto riba Bushiri Beach y diadomingo dia 10 di augustus lo tin e pier party ( Bright Summer Sessions). Mester menciona cu e evento di diadomingo ta completamente bendi caba. Tambe lo tin Warm Up y Closing parties na Tantra Night Club cu lo habri pronto.
Bright Summer Festival a logra di trece hunto diferente atraccion musical cu Aruba sigur lo disfruta di dje. Apart di esey, e organisacion ta pone hopi enfasis tambe riba e ‘experiencia’ di e persona cu ta bishita e festival. For di entrada te ora cu e persona bay cas, e lo sinti un evento excepcional. Ta hopi aña tambe caba cu no tin evento musical di e magnitud aki riba beach. Esaki lo hacie algo unico mirando cu e lo cuminsa for di 6 or di atardi caba y lo por disfruta di un bahada di solo unico.
Amstel Bright ta e patronicado principal di e evento aki y pa nan tambe ta un placer pa mira e evento evoluciona den un festival di mas dia. Amstel Bright y Romar Trading cu su productonan superior lo percura pa dos dia cu un bon stock, prijsnan special y tambe diferente campaña na caminda pa evento.
Ticketnan pa e evento aki ta na benta caba y ta bayendo hopi lihe mes. Ticketnan general y Standing VIP ta disponibel na Citgo Boulevard, Citgo Essoville, Pay.aw y brightsummeraruba.com. Pa loke ta trata e mesanan vip, esakinan a yega na su capacidad caba y ta sold out!
Manera anuncia anteriormente, e otro artistanan ta Kapo, Jeon, Mystical Connection, Krokz, Yeimy, Nutzbeatz, Mark Benson, MC Tarrick Ras y Chris Strick. Adicionalmente lo tin un di dos area aparta di e ‘main stage’. Esaki ta e ‘House of Friends Stage’ presenta pa e tequila ‘Casa Amigos’ . E area aki lo concentra riba musica electronico cu djnan local y internacional manera Dj M, Steve Andreas, Pava,Dj V, Alex, y Adrian Croes.
Pa mas informacion www.brightsummeraruba.com
