fundacion Mi Cutisa ta gradici un y tur cu a bishita su dia di famia, diadomingo ultimo.
Na honor di World Healthy day, Mi Cutisa a tene un dia di famia na Museo Cas Tan Tin na Pos Abao. E dia tawata bon bishita y tur bishitante por a cana den e cas y ricibi informacion tocante di e bida di antes den un cas tipico na Aruba. E presentacion tawata den man di Addonsito Croes. Tawata tin pasabocanan saludabel manera bolo di bacoba y pruim. Tambe por a cumpra e famoso juice di tamarijn y lamunchi di Cas Tan Tin. Hopi tawata e mayornan cu a bini cu nan yiunan pa scucha e storia di Cas Tan Tin. Esnan presente a disfruta di presentacion di musica di caha di orgel El Diamante di Alejandro ‘Patan’ Farro y tambe e baile di Gucci Dancers.
E dia aki fundacion Mi Cutisa a dispidi di sra. Nerissa Giel cu a pasa e presidencia pa Arthur Kelly. Na nomber di Mi Cutisa, Ghyslaine Krosendijk vise-presidente di Mi Cutisa a gradici Nerissa Giel y a entreg’e algun regalo. Tambe a introduci e miembronan nobo Arthur Kelly como presidente, Dylan Fingal como segundo tesorero y Addonsito Croes como secretario.
Mi Cutisa ta gradici prensa di Aruba, boluntarionan y tur hende cu a acudi e dia aki. Pronto ta bini mas actividad. Pa mas informacion por bishita e pagina di Mi Cutisa riba Facebook.
