Gezaghèber Edison Rijna, ku aktualmente ta di bishita di trabou na New York, a partisipá djárason mainta na un seshon di desayuno na kua Rei Willem-Alexander a invitá delegadonan di Estadonan di Islanan Chikitu den Desaroyo (Small Island Developing States/SIDS). Tópiko di kòmbersashon tabata entre otro kambio di klima i e konsekuensianan pa islanan chikitu.
Promé ku e reunion, e rei den un mensahe di video a bai den detaye riba e menasa pa Boneiru i kon e isla por ehèmpel ta prepará su mes pa kambio di klima ku fortifikashon di mondinan di palu di mangel. Despues di e seshon di desayuno, e gezaghèber a asistí den e sala plenario di Nashonnan Uní na e apertura ofisial di e konferensia tokante awa. Rei Willem-Alexander a menshoná eksplisitamente e partinan karibense di Reino den su diskurso di apertura.
Despues di e apertura, Gezaghèber a partisipá na algun seshon tokante maneho di awa, espesialmente relashoná ku isla chikitu i el a hasi kontakto ku partidonan ku den futuro posiblemente por nifiká algu pa Boneiru. Boneiru mes tambe ta anfitrion di un enkuentro den kua gezaghèber Rijna ta bai papia tokante e konsekuensianan di kambio di klima ku e isla ya kaba ta nota, manera e problema grandi ku awaseru di novèmber aña pasá i e ròl ku Mesa di Klima Boneiru ta hunga den tumamentu di medida kontra entre otro subida di nivel di laman.