Kolaborashon entre entidat públiko Boneiru i forma ta oumentá oportunidat pa empleo

Ku orguyo Entidat Públiko Boneiru ta anunsiá e prome resultadonan eksitoso di e kapasitashonnan di hospitalidat. Riba djaweps 8 di yüni 2023 no ménos ku 44 kursista a risibí nan diploma. Entidat Públiko Boneiru huntu ku FORMA a ofresé e kapasitashonnan akí riba tereno di hospitalidat gratuitamente na e personanan ku por a hasi bon uso di e oportunidat akí. E kapasitashonnan por oumentá oportunidat riba merkado laboral. Banda di esaki nan ta kuadra ku e vishon pa mehorá kalidat di servisio na Boneiru.

Na luna di ougùstùs 2022 Entidat Públiko Boneiru i FORMA a firma un akuerdo di kolaborashon ku e meta pa ofresé kapasitashon di hospitalidat grátis na nos poblashon pa mihó oportunidat riba merkado laboral. Rápidamente e kapasitashonnan tabata yen i durante e último 12 pa 16 simannan e kursistanan a sigui nan ku hopi entusiasmo. Práktikamente tur kursista a optené nan diploma.

A entregá e siguiente diplomanan:

• 19 diploma pa e kapasitashon di ‘Housekeeping’ (limpiesa)
• 12 diploma pa e kapasitashon di Abilidat Sosial
• 13 diploma pa e kapasitashon di Atenshon pa kliente

Durante entrega di diploma tantu e diputado aktual komo e diputado anterior di turismo i ekonomia a tene un diskurso di motivashon. Diputado Thielman tabata kontentu ku e éksito di e kapasitashonnan. El a pone énfasis riba importansia di e inisiativa akí pa nos isla. ‘Ta fantástiko pa mira ku e kapasitashonnan tabata asina eksitoso i ku tur hende a logra haña un diploma’, segun diputado Thielman. ‘Pa nos bishitantenan ta importante pa mira un kara fiho ora nan bini nos isla bèk. Pa e motibu akí nos ke duna netamente nos habitantenan fiho un oportunidat pa mihó empleo i pa mas apresio den nan trabou. E kapasitashonnan ta duna un oportunidat pa esaki. P’esei mi deseo ta ku nan ta sigui ta hopi eksitoso den futuro!’

Na esaki diputado Jolinda Craane a añadí: ‘E hendenan akí ta hopi importante pa Boneiru. Pa e motibu akí mi ta spera ku tur hende lo tin hopi benefisio di loke nan a siña. Mi ta spera tambe ku nan lo por sigui krese den nan desaroyo i entrada. Dentro di poko nos ta kuminsá atrobe ku kapasitashonnan nobo i nos ta spera di haña minimalmente mes tantu partisipante lokal entusiasmá.’

Banda di e kapasitashonnan akí pa kursista adulto na FORMA, Entidat Públiko Boneiru a ofresé kapasitashon pa hóbennan tambe ku ta interesá pa traha den sektor di turismo. Entidat Públiko Boneiru a krea posibilidat nobo pa formashon pa medio di ofresé dos hóben di Jong Bonaire un estudio pa Divemaster via e ‘Murphyn Henar Foundation’. Aparte di esaki ta hibando kòmbersashon ku entre otro MBO pa uni forsa pa loke ta trata formashon di hóbennan den sektor di buseo i sektor di (kite)sùrf. 

For di luna di sèptèmber kapasitashonnan nobo di hospitalidat lo ranka sali atrobe via FORMA. Entidat Públiko Boneiru ta konsehá pa tene tur notisia bon na bista i sigui Entidat Públiko Boneiru i FORMA via medionan sosial.