Conseho di Minister di Reino den nomber di Rey Willem-Alexander a nombra Ajamu Baly como gobernador nobo di Sint Maarten. AjamuBaly lo reemplasa Eugene Holiday den e funcion di gobernador, cu su di dos termino ta caba 10 di oktober proximo. Gobernador aspira Baly lo asumi encargo como gobernador durante di un reunion solemne den Staten di Sint Maarten.
Gobernador di Sint Maarten ta representa Rey y den e capacidad aki ta hefe di e gobierno di Sint Maarten. Den e funcion aki e ta inviolabel y e ministernan ta responsabel. Como organo di Reino, Gobernador ta atende y percura pa e interesnan di Reino Hulandes. Rey ta nombra Gobernador pa un periodo di 6 aña. E por keda maximal 12 aña den funcion.
Ajamu Baly (1977) ta naci na Sint Maarten. El’a studia Derecho Hulandes na Universidad di Amsterdam. Desde 2014 Baly a eherce e funcion di ‘Secretaris-Directeur’ di Raad van Advies (Hunta di Conseho) di Sint Maarten. Tambe for di comienso di e aña aki e ta hues-comisario suplente di Corte Comun di Husticia. For di 2017 e ta miembro di e Hunta di Komisario di Banco Central di Curaçao y Sint Maarten.
Conseho di Minister di Reino a yama danki na Gobernador saliente Holiday pa su empeño pa Reino.
Photo NU.CW