Minister di Husticia Arthur Dowers den e reunion di presupuesto supletorio a indica cu a haya pregunta si Aruba tin suficiente taxi cu ta traha den oranan di anochi y si tin condicionnan stipula den nan permiso cu taxistanan mester traha cierto ora den oranan di anochi.
Segun minister Arthur Dowers esaki no ta e caso na e momentonan aki. Sinembargo gobierno ta sintando cu tur e stakeholdersnan pa papia riba e tematica aki y kico ta tur e problemanan cu nan ta confrontando pa por haya servicio di Taxi den oranan di anochi. Tambe lo a sinta cu diferente organisacionnan di taxi tambe y minister Arthur Dowers ta di opinion cu e pensamento y e opinion di stakeholders y organisacionnan di taxista ta hopi leu for di otro.
Tambe e mandatario ta indica cu a haya informacion cu lo tin un APP y e APP ta di e taxista nan , pero no tin un APP di gobierno of di Pais Aruba cu ta atende cu e taxistanan.
Sinembargo por a compronde cu e taxistanan mes a habri un app pa nan mes duna servicio, pero esey no ta regla door di gobierno.
Minister Arthur Dowers ta kere cu si e por ta un opcion pa sondea den futuro pa Aruba garantisa cierto servicionan y transparencia den henter e proceso aki.