Na Shiribana dialuna anochi algo pasa di 7’or y mey patruya di Playa a bay Shiribana poco pabou di Loxing Supermarket, unda cu e homber conoci bou e nomber Brian tabata di remate. For di oranan trempan di atardi e homber aki tabata causa masha hopi problema den Paradera y Shiribana. Na Paradera e la piki piedra pa manda algun persona. E tabata grita y por a mira cu e tabata full soda y bastante altera.
Den oranan di anochi e la bay e cas conoci pa adictonan na Shiribana y tabata subi caminda grandi y cana memey caminda. Un time bomb completo. Treciendo su bida y trafico na peliger.
Dado momento e la drenta un supermercado spantando tur hende. Por a mira cu e la sali cu algo di bebe na man, no sa si e la paga pa esaki. Na yegada di polis nan a bay cas di De Mey unda e la bay hinca su curpa.
Polisnan a baha y a bati duro na e porta gritando su nomber y ora e la sali ey mes agentenan a detene y pidi transportwagen.
Na e sitio nos por a compronde cu polis mucho nan no por haci. Berdad nan a detene pa e dialuna anochi pa su haltura baha, pero ya kisas pa mañan e por ta ariba caya causando peliger pa su mes y ciudadanonan inocente.
E persona aki ya pa masha hopi tempo tin problema cu ne y cada biaha e ta birando mas serio, manera dialuna anochi ora cu e ta core subi caminda grandi memey di autonan.
