Minister Maduro a reuni cu e team di Fiscal Affairs di IMF y CARTAC kendenan a presenta e rapport ‘Strenghtening Fiscal Planning,’ cual ta un investigacion pa yuda mehora e proceso presupuestario di Pais Aruba. Pa 5 siman largo e team di IMF y CARTAC, cu ta e asesor di IMF pa Caribe, a pasa den tur informacion y proceso presupuestario di nos Pais pa asina por a bin cu recomendacion pa mehora e structura presupuestario di nos Pais cu e meta pa yega na presupuestonan multi-anual cu ta mas realistico. E hecho cu Aruba ta bou supervicion financiero y cu COVID19 ta impacta nos Pais grandemente, ta pone cu Gobierno mester haya un claridad tambe si e normanan financiero cu ta stipula pa e añanan nos dilanti ainda ta keda realisabel pa nos Pais. Riba esaki tambe e team a brinda nan recomedacion. Na momento cu e rapport ta cla pa publica, Minister di Finansa lo amplia riba e recomendacionnan. Pa awor por bisa cu IMF ta recomenda Aruba pa fortalece e structura di presupuesto y despues fiha e normanan presupuestario cu kier logra cumpli cune pa e añanan cu ta sigui. Minister Xiomara Maduro ta gradici e team di IMF FAD y CARTAC y tambe e team di Aruba pa e trabou importante aki haci pa nos Pais memey di e pandemia cu nos ta aden.
IMF hunto cu CARTAC a revisa e sistema presupuestario di Aruba
