Conseho di Minister a haya un presentacion di Banco Mundial riba e investigacion cu nan a haci riba e seguridad di nos cuminda na Aruba durante y despues di e pandemia di COVID19.
Memey di e pandemia di COVID19 Minister Maduro di Economia a pidi asistencia di Banco Mundial pa yuda haci un ‘rapid assessement’ di e seguridad di cuminda pa Aruba pa asina sigura cu nos tin suficiente cuminda durante e pandemia, y pa Banco Mundial recomenda nos ki paso pa tuma pa sigura cu nos por keda abastece nos mes di cuminda na un manera sigur despues di e pandemia tambe.
Banco Mundial a recomenda pa desaroya agricultura na Aruba basa riba dos pilar, en corto, inverti den scala comercial via start ups y promove inversion den scala micro manera plantacion patras na cas of riba dak di cas of edificio. E rapport cu tur recomendacion ta disponibel via e link, https://issuu.com/gabinetewevercroesaruba/docs/building_resilience_in_aruba_s_food_security_durin?fr=sZGY1NjIwOTgzNQ
Conseho di Minister a pidi Departamento Economico y Santa Rosa pa traha riba un plan con por implementa e recomendacionnan mas pronto cu ta posibel. Agricultura ta un di e 6 sectornan prometedor pa diversifica nos economia y via cooperacion regional y cu yudansa di tecnologia nobo e posibilidad tey pa den forma comercial y/of nos por abastece y sigura cuminda pa nos Pais.
Minister Xiomara Maduro ta gradici e team di Banco Mundial y tambe e team di Departamento Economico y Santa Rosa hunto cu economista Rendell de Kort pa e trabou importante aki haci pa Aruba memey di un pandemia.