Incidente inespera di awa ta causa daño na Wondpoli di HOH

Diadomingo durante oranan di mainta a surgi un incidente inespera di derame di awa na Wondpoli di Horacio Oduber Hospital. Door di e incidente aki Wondpoli lamentablemente a keda completamente yena cu awa. Di biaha a bati alarma y un team interno a lora manga y cuminsa cu e limpiesa di awa cu a core bastante y a causa basta daño. Mirando cu ta un departamento asina esencial pa sigui brinda nan servicio di biaha a traha riba un plan pa asina busca solucion pa pashent por sigui ricibi e cuido necesario desde mayan.

INFORMACION PA TUR PASHENT DI WONDPOLI

• Na prome luga diadomingo merdia team di Wondpoli a yama pashent cu tin cita mayan pa asina informa nan di e incidente. Mayan nan lo sigui cu e pashentnan cu falta.
• Pa casonan di emergencia a pone cla temporalmente un camber pa atende pashent na departamento di endoscopie cu ta den e mesun gang di Wondpoli riba dialuna y diamars si ta necesario.
• Entre awe, diadomingo, y tambe dialuna lo muda Wondpoli completo pa su localidad anterior, esta den Medical Office Building (MOB) na e parti dilanti di e edificio.

INFORMACION DEPARTAMENTO DI ADMISION

• Departamento di Admision ta muda awe, diadomingo pa prome piso di Medical Office Building (MOB) temporalmente pa asina Wondpoli por atende nan pashentnan na nan localidad anterior.

Si tin cualkier pregunta pashentnan di Wondpoli por yama libremente dialuna entre 7am y 3pm na 527 4200 of 597 4405. Si tin cualkier pregunta pa departamento di Opname por yama na 5274000 y nan lo comunica bo persona cu e departamento concerni.

Hunta di Directiva y Management completo ta hopi orguyoso di con lihe tur cos a bay y ta desea di bisa danki na e team di Hospital, esta personal di Technische Dienst, Hoteldienst, Security di Cluster Facility cu di biaha a lora manga y yuda cu e limpiesa. Despues cu a bati alarma mas colega di HVT a bin yuda y tambe colega di Wondpoli, Opname, IT, Hygiena y mas cu semper ta cla para pa yuda sin importa dia ni ora nan tey pa asina salvaguardia e cuido pa nos pashentnan. Boso ta keda demonstra “time after time” cu team di HOH ta super!