E Ofisina di Ehekushon di Proyekto (Project Uitvoeringsbureau – PUB) den e próksimo añanan ta bai hunga un ròl krusial pa optené resultadonan visibel pa habitantenan di Boneiru. Lantamentu di e Ofisina di Ehekushon di Proyekto (PUB) ta un di e partinan di e Sup-plan di Mehorashon pa direktorado di Planifikashon i Desaroyo, ku ta enfoká riba desaroyo kontinuo di e organisashon i riba konfrontashon di e desafionan di awe i di futuro.
E Ofisina di Ehekushon di Proyekto (Project Uitvoeringsbureau – PUB) a habri dia 16 di yüni último den presensia di señor Roy Martina, direktor di Planifikashon i Desaroyo, diputado James Kroon, diputado Hennyson Thielman i señor Roald Lapperre e Direktor-General Medio Ambiente i Internashonal di ministerio di Infrastruktura i Maneho di Awa.
Durante e añanan binidero mester realisá vários proyekto stratégiko i kompleho i programa grandi for di direktorado di Planifikashon i Desaroyo. Esaki ta eksigí un aserkamentu profeshonal a base di proyekto. Pa e motibu akí ta duna direkshon na e proyektonan akí for di e Ofisina di Ehekushon di Proyekto. Esaki ta sòru pa ménos estorbo posibel pa e trabounan regular di e departamentonan i tin mihó atenshon pa preparashon i ehekushon di e proyektonan.
E Ofisina di Ehekushon di Proyekto (Project Uitvoeringsbureau – PUB) ta kuminsá ku un kantidat limitá di proyekto, entre otro Kombustibel i Infrastruktura/Kaminda, i mas despues e aña akí e programa Maneho di Shushi na Midí i ehekushon di e Plan di Maneho pa Naturalesa i Medio Ambiente.
Di e manera akí nos por elaborá i mehorá e manera di traha akí mas aleu durante e periodo binidero. E meta final ta pa por apliká e eksperensia atkerí i e forma di maneho di proyekto akí den henter Entidat Públiko Boneiru.
