Direktorado di Espasio i Desaroyo (R&O) di Entidat Públiko Boneiru a laga traha un kaminda temporal di greis riba Bulevar Gobernador Nicolaas Debrot. Riba e kaminda aki hopi biaha tin awa di laman den e bògt na altura di e Harbour Village Marina Bonaire. Outomobilistanan ta haña nan obligá aworakí di pasa den e awa salu aki. Ku e kaminda temporal di greis ta remediá e situashon.
A prepará e trabounan riba djabièrnè último 25 di sèptèmber 2020 i a kuminsá traha e kaminda djasabra 26 di sèptèmber 2020 och’or di mainta. E trabou nan ainda ta andando. Pronto esaki ta kla, pa asina e outomobilistanan no tin ku pasa ku nan vehíkulo den e awa salu ku ta subi e kaminda na altura di ‘jachthaven’.
Entidat Públiko Bonaire ta konsiente di e inkonbeniensia i ta gradisí komunidat pa nan koperashon. Pa kualkier informashon por tuma kontakto libramente ku departamento di R&O na number di telefòn 715- 5381.
