Durante di reunion di Konseho Insular di 2 di novèmber último (reunion di forma opinion), kaminda a trata e presupuesto ku Kolegio Ehekutivo a entregá pa 2022, frakshon di Partido Demokrat a ekspresá su malkontentu pa e echo ku no a presupuestá fondo destiná pa agrikultura, krio di bestia i peska.
Rolanda Hellburg-Makaai ta indiká ku su frakshon a tuma nota ku e medionan finansiero pa e sektor di agrikultura pa aña 2022 a bira menos enbes di mas. Pa e pòst di presupuesto ‘desaroyo di agrikultura na Boneiru inkluyendo abatuar’ a presupuestá pa aña 2021 un montante di $1.1 mion; pa aña 2022 e montante aki ta $0,-. Pa e pòst di presupuesto ‘promoshon di agrikultura, krio di bestia i peska’ a presupuestá pa aña 2021 un montante di $222.000,-; pa aña 2022 a redusí e montante aki na $59.500,-.
Durante di tratamentu di e presupuesto pa aña 2022 Frakshon Demokrat a trese dilanti ku a base di e ordenansa di ‘opcenten vastgoedbelasting Bonaire’, Entidat Públiko Boneiru a generá $750.000,- èkstra na entrada. Den e presupuesto di 2022 por mira tambe ku ta kobra e montante aki. ‘Opcenten vastgoedbelasting Bonaire’ ta un porsentahe fiho (30%) ku Entidat Públiko Boneiru ta kobra riba e montante di ‘vastgoedbelasting’.
For di e montante di $750.000,- èkstra ku Entidat Públiko Boneiru a generá, a reservá $250.000,- pa agrikultura, krio di bestia i peska. E frakshon a puntra e diputado enkargá ku agrikultura, señor James Kroon, dikon no ta mira e montante aki riba e presupuesto di agrikultura pa 2022. Frakshon Demokrat ke mira kon ta bai gasta e $250.000,-.
Ta premirá ku Entidat Públiko Boneiru ta bai kobra $5.5 mion èkstra na impuesto di turismo. Den e kuadro aki frakshon Demokrat a hasi diputado Kroon e pregunta si banda di e montante di $250.000,-, no por kita algu for di e $5.5 mion èkstra pa invertí esaki tambe den agrikultura; pues dikon no ta invertí mas sèn for di otro fondo den agrikultura, krio di bestia i peska pa stimulá esaki?
Tokante e kontenido di e ordenansa di ‘opcenten vastgoedbelasting Bonaire’ Rolanda Hellburg-Makaai ta remarká ku durante di e proseso pa modifiká i ratifiká e ordenansa den Konseho Insular algun aña pasá, Kolegio Ehekutivo a proponé i primintí ku for di e entrada èkstra di ‘opcenten’ nan lo a reservá fondo pa agrikultura. Frakshon Demokrat tambe a indiká ku mester hinka esaki den e ordenansa ariba menshoná. Al final Kolegio Ehekutivo no a bai mas di akuerdo i koalishon a vota pa pasa e ordenansa sin hinka e fondonan pa agrikultura aden.
Rolanda Hellburg-Makaai ta terminá bisando ku su persona i frakshon Demokrat no ta satisfecho ku e presupuesto di 2022 i ku ta di lamentá ku ya esaki a pasa pa e reunion di tuma desishon den Konseho Insular. Na su opinion tin diferente tópiko ku e Gobièrnu aktual no ta haña importante pa invertí aden pa aña 2022.
