Manera ta reglá den e Areglo Mutuo di Kolaborashon pa Reformanan, ministernan-presidente di Kòrsou, Aruba i Sint Maarten i minister di Asuntunan Interno i Relashonnan den Reino a nombra un komishon di evaluashon. E komishon aki lo duna un bista di funshonamentu, efektividat i efekto di e Areglo Mutuo.
Areglo Mutuo
Fin di 2020 e paisnan Aruba, Kòrsou i Sint Maarten i Hulanda a firma e Paketenan di Pais. A realisá e akuerdonan akí na momentu di duna sosten di likides durante e pandemia di COVID-19. Kada Pakete di Pais ta kontené un variashon amplio na reforma, pa oumentá resistensia ekonómiko i poder atministrativo di e paisnan karibense. Na aprel 2023 a formalisá e kolaborashon den e Areglo Mutuo di Kolaborashon pa Reforma. E Areglo Mutuo tin un durashon di kuater aña, ku posibilidat di prolongashon. Den e Areglo Mutuo a palabrá pa despues di tres aña laga un komishon independiente evaluá e kolaborashon.
Ekspertonan independiente
E komishon di evaluashon ta konsistí di un presidente independiente selektá ku konsentimentu di e kuater pais i kuater miembro independiente, selektá a base di nan profeshonalismo supstansial.
E miembronan di e komishon di evaluashon ta:
– presidente señora Maria van der Sluijs-Plantz;
– komo representante di Aruba señor Angel Bermudez;
– komo representante di Kòrsou señor Francis de Lanoy;
– komo representante di Hulanda señor Cees Slager;
– komo representante di Sint Maarten señor Franklyn Richards.
Pa sostoné e evaluashon, e komishon lo hasi uso di un ofisina di investigashon independiente.
Siña di e kolaborashon
E evaluashon ta importante pa toma di desishon atministrativo den tur kuater pais riba eventual kontinuashon, terminashon òf adaptashon di e Areglo Mutuo. Ta intenshon tambe pa siña di e evaluashon pa duna futuro kolaborashon un forma hurídiko i atministrativo efektivo i duradero, tantu paden komo pafó di e Areglo Mutuo. Pa mas tardá maart 2026 mester entregá e rapòrt di evaluashon na ministernan-presidente di Kòrsou, Aruba i Sint Maarten, minister di Asuntunan Interno i Relashonnan den Reino.