Kompania di Tou Boneiru (KTB), un filial di Kompania di Tou Kòrsou (KTK), a firma un konseshon ku Entidat Públiko Boneiru (OLB) pa por presta servisio di tou pa e próksimo 5 aña den e hafnan di Boneiru. KTB ta establesé na Boneiru.
Konforme e akuerdo akí ta stashoná e toubot OLA na Boneiru. E kompania boneriano ‘Captain Dime’ lo sòru pa un tripulashon boneriano ku ta bai enkargá su mes ku e parti operashonal di e toubot.
For di aña 2018 KTK a establesé su filial KTB ku e vishon pa Boneiru tin su propio servisio di toubot. E logro importante akí ta forma un base pa sigui sera koperashonnan komersial estrecho i pa largu tempu entre e paisnan, segun minister Ruisandro Cijntje di desaroyo ekonómiko i turismo di Kòrsou.
Na e okashon akí di parti di Boneiru tabata presente diputado Hennyson Thielman, kapitan di haf Günther Flanegin i gezaghèber interino Nolly Oleana. Di parti di Kòrsou tabata presente minister Cijntje, presidente komisario di CPA/KTK Sr. Candelaria, direktor di KTK Sr. Rojer i direktor di CPA Sr. de Castro.
