Un di e puntonan di lansa den nos akuerdo di gobernashon ta stimulashon di partisipashon di hóben na un manera struktural. Esaki ta nifiká ku e gobièrnu aktual akí tin komo meta pa enbolbí hóbennan den formashon di maneho i toma di desishon, di manera ku nan por kompartí nan ideanan, opinionnan i solushonnan tokante kon nos por atendé ku e desafionan aktual na Boneiru. Nos no mester lubidá ku e desishonnan ku nos tuma awe, lo tin konsekuensia pa nan mañan. Pa e motibu akí ta bon pa enbolbí nan aworakí ku e desishonnan akí.
Mas atenshon pa partisipashon di hóben
Esaki ta algu ku semper mi a sostené i ta un di e motibunan tambe ku mi a funda mi partido, pasobra mi ta haña ku mester tin mas atenshon pa partisipashon di hóben. No ta pa motibu ku hóbennan tin ku bai den eksterior pa sigui desaroyá nan mes (pasobra na Boneiru esaki no ta posibel), esaki ta nifiká ku nan no tin derecho di laga tende nan bos ora ta trata di desaroyo mas aleu di Boneiru. Pero por mir’é di un otro banda tambe. No ta pasó un hóben a skohe pa keda Boneiru enbes di bai studia afó, esaki ta nifiká ku e lo no ta kapas pa yuda pensa kon ta e mihó manera pa desaroyá Boneiru
Órgano di konsulta
Mi ta kontentu di mira ku e organisashon di hóben ‘BIT-lab’ lo ta na Boneiru pa presentá nan organisashon na Boneiru. Mi mes, huntu ku algun di mi koleganan di Konseho Insular tabata na Hulanda kaminda nos a bai e presentashon di nan buki di potrèt pa skucha i mira e diferente storianan di e hóbennan pero tambe pa skucha e diferente vishonnan ku nan tin pa Boneiru i kon nan ta kere ta e mihó manera pa desaroyá Boneiru. Mi ta boga pa e organisashon aki bira un órgano di konsulta ku ta konsistí di hóbennan di Boneiru, pa di e manera ei hasi investigashonnan pa loke ta trata e desafionan na Boneiru ku tin impakto riba nos hendenan i haña un solushon adekuá pa esakinan. E ora ei e órgano di konseho akí no mester konsehá solamente nos gobièrnu lokal, pero tambe e kompanianan di gobièrnu i otro instansianan ku tin di aber ku diferente reto ku tin impakto riba nos hendenan.
Mas sientífiko boneriano
Mi ta kòrda por ehèmpel e storia di Dylan van Arneman. Un sientífiko boneriano ku ta biba na Hulanda pero ta traha na Suisa. El a duna di konosé ku na Boneiru nos ta duna muchu tiki sosten na e área di siensia. Lo ta un idea por ehèmpel pa laga hóbennan manera Dylan hasi un investigashon pa wak kon por duna mas atenshon na siensia na Boneiru pa asina ei nos por tin mas sientífiko boneriano. I asina tin diferente otro kos ku e hóbennan akí por bai investigá pa nos. E hóbennan den e buki di potrèt a demonstrá ku nan tin konosementu riba diferente área i ku nan tin e kurashi tambe pa kompartí nan opinion tokante kon nan ke mira nan isla.
Ami sigur lo t’ei dia 17 di aprel binidero na Jong Bonaire na e presentashon di BIT-lab i tambe den Konseho Insular lo mi bringa duru pa e hóbennan akí haña un bos mas klave den formashon di maneho i toma di desishon ku ta regardá Boneiru. Nos no mester lubidá ku Boneiru ta nan isla tambe!
