Durante Kanto Krioyo, Sekshon di Kultura Arte i Literatura, (SKAL), ta bai registrá tur bailadó, eskulptor, kantante, músiko, pintor poeta i otro artista na Boneiru. Lema di e kampaña akí ta Kultura ta mi – Registrá i laga sa ken bo ta! Di e forma akí SKAL ke inventarisá i registrá tur talento kreativo na Boneiru. Ta usa e registrashon pa yega na un archivo digital kultural. SKAL lo por hasi bon uso di e archivo akí na ora ku mester di artista pa kalke evento por ehèmpel.
Registrashon i informashon pa públiko
Festival ‘Kanto Krioyo ‘ta tumá lugá di 9 te ku 12 di aprel. SKAL ta pone e dianan ei un lugá fiho den públiko kaminda tur artista por registrá. Kolaboradónan di SKAL ta kana den públiko tambe pa parti flayer i formulario pa registrá. Tur artista por registrá mesora durante ‘Kanto Krioyo’ òf skohe pa registrá despues ku nan selular usando un QR-code. Kada artista ku registrá ta haña un tishùrt di ‘Kultura ta mi.’
SKAL ta invitá henter komunidat pa bai apoyá nos músiko i kantantenan ku ta partisipá na Kanto Krioyo. E evento ta tuma lugá na stadion Antonio Trenidat na Rincon. Pa mas informashon òf pregunta tokante ‘Kultura ta mi’ por tuma kontakto ku Segni Bernadina, coach kultural, +5997175330 òf +599 796567, òf meil segni.bernardina@bonairegov.com.