No tin amigo mas grandi cu Cristo Hesus, no ta existi mihor amistad, no tin amor mas duradero, tur
caminda E tey, tur momento E tey, E ta nos Salbador, nos Abogado, nos Defensor, nos Ayudador, nos
amigo fiel, tur esey E ta pa nos.
Pesey nos mester aprecia tur locua cu E a haci pa nos, pasobra E a stima nos prome, ta E a saca nos for
di scuridad, y trece nos na Su lus, e a ranca nos for di man di diabel, cumpra pa nos pa un preis cu su
bida, pesey nos mester demostra gratitud na Cristo Hesus.
Den Cristo Hesus no tin discriminacion, tur hende ta igual, ningun ta mas halto cu otro, pasobra Su
amor ta mescos pa nos tur , Su amor ta incomparabel, E no ta lubida riba ningun hende.
E a gana tur den Su Fieldad, pasobra aunke cu nos por ta infiel, E ta fiel den tur cos.
Su nomber ta garantia di fieldad,
garantia di amistad,
garantia di amor,
garantia di confiansa,
garantia di stimacion,
Su nomber ta riba tur nomber,
garantia di sanacion,
garantia di liberacion,
garantia di bida eterna,
garantia di bondad,
garantia di libertad.
Te ken por nenga di kere den Su nomber? Ta ken por nenga di kere den Su poder? Ta ken por rechasa
Su amistad?
Ora amigonan ta corre bay, E ta permanece, Ora nos ta kibra E ta lanta nos, ora nos no por mas E ta
para banda di nos, E semper tey pa yuda nos, Ora nos ta contento, y ora nos ta tristo E ta nos Fortalesa.
Ora nos menciona Su nomber, scuridad mester huy, diabel ta tembla y sali na careda, forsanan di
maldad ta wordo kibra, inhusticia ta basha abao,pas ta bini y reina meymey di nos.
Su presencia ta haci e diferencia, ta trece cambio den nos bida, ta lanta nos for di suela, y pone nos
sinta banda di dj’E, Su amor ta imcomparabel, grandi ta Su Fieldad, bondad y husticia ta biba serca
dj’E, amor y fieldad ta Su naturalesa.
Riba mundo y den henter universo no tin poder mas grandi cu e poder di Dios, mundu ta broma cu
poder militar, poder di placa, poder politico, poder di malicia y maldad, pero ora e poder di Dios lanta
mundo tin cu para keto y realisa cu no tin pa compara cune.
Ma Dios a demostra Su mes amor pa cu nos den esaki, cu tempo nos tabata pecador ainda, Cristo
Hesus a muri pa nos.( Romanonan 5:8).
E ta manda nos pa stima otro, mescos cu E a stima nos, pa pordona otro, mescos cu E a pordona nos, E
ta bisa nos pa biba bon cu otro, Pasobra nunca E tabata na malo cu nos, cas di tur hende E ta drenta,E
ta bati na tur curason, E tin tur bida den Su man.
Pega den Cristo nos por tur cos , leu for di Cristo nos no por nada, e ta e unico y berdadero Salbador, E
unico cu a entrega su bida pa nos, e unico cu nunca ta bandona nos.
Mi a wordo crucifica cu Cristo,y no ta ami ta biba mas,ma Cristo ta biba den mi, y e bida cu mi ta biba
awor den carni, mi ta biba pa edio di fe den e Yiu di Dios,Kende a stima mi y a entrega Su mes pami.(
Galationan 2;20).
Awe ta un grandi dia, pa nos por recorda e gran bondad, di nos Senjor Cristo Hesus.
E ta Fiel.
Sinceramente, Pastor Marcel Balootje.