FRACCION DI MEP A REUNI CU GREMIONAN
ATIA a tuma lugar un encuentro importante entre fraccion di MEP, gremionan sindical y comercial. Esaki ta e di dos encuentro cu Fraccion di MEP ta organisa cu gremionan. E biaha aki tawata pa comparti e conseho cu nos a ricibi for di Profesor Elzinga cu ta un experto riba e area di ley constitucional na Hulanda y na Aruba.
Lider di fraccion di MEP, sra. Evelyn Wever-Croes, a manda un mensahe fuerte y cla riba e mainta aki: “E ley di HOFA no ta bon pa Aruba, pasobra e ta frena nos desaroyo economico. E ley tin articulonan cu ta contra nos Constitucion. Ademas, Aruba ya tin un sistema di supervision financiero cu ta funciona bon. HOFA no ta soluciona nada, e ta solamente crea problema.” Durante e encuentro, MEP a presenta e opinion di profesor experto Elzinga, cu a confirma cu HOFA ta viola Constitucion y ta mina e base di colaboracion igual entre Hulanda y paisnan caribense. Wever-Croes ta splica con y dicon esaki ta un movida peligroso y con esaki lo limita nos desaroyo economico y pone nos pais bou di un control innecesario.
Fraccion di MEP a tuma e mainta aki pa splica cu Aruba ya caba ta den un rumbo positivo pa loke ta trata finansas di pais. Si nos sigui maneha bon, den 4 aña nos ta logra nivel di debe di 50% sin mester un rijkswet. HOFA no ta un necesidad, ta un menasa e ta.
Finalmente, fraccion di MEP ta haci un yamada fuerte: “Ta e ora pa Aruba UNI. Pa pone un stop na un ley inhusto pa nos pais y su desaroyo.” Gremionan sindical y comercial a mustra gran interes y a expresa gratitud pa e claridad y determinacion di MEP. Di parti di fraccion por conta cu nos lo sigui reuni, informa y lo sigui trece claridad riba e tematica aki. Manera profesor Elzinga a sugeri: “Mihor nos realisa awo na mitar caminda cu esaki ta un ekibocacion y nos bira bay bek, cu sigui insisti den e direccion incorecto!”
