E caso di Poentje Castro, periodista Arubiano cu a wordo haya morto na 2010, ta un sucedido cu ta trece hopi tristesa y preocupacion den comunidad periodistico di Aruba. Mas cu dies aña despues di e crimen, e caso ainda no a yega un punto di husticia definitiva. Sr. Luis Villegas, cu den pasado tabata periodista Aruba, periodista freelance, y cu awor ta un hurista studiando pa obtene su Master’s den Staats-en Bestuursrecht na Universidad di Amsterdam, a tuma gran interes den e caso aki y e forma con e investigacion a bay.
El a splica cu prome biaha cu el a tende di e caso, e tabata na Hulanda, atraves di un publicacion cu a wordo haci en conexion cu Dia Internacional contra Impunidad pa crimen cometi contra periodistanan. ”Mi a keda impacta di sa cu un periodista Arubiano a wordo mata 10 aña prome y cu despues di tanto tempo, no tin persona cu a wordo haya responsabel,” asina Villegas a bisa.
Haciendo uzo di e conocemento cu sr. Villegas tin el a presenta un peticion formal na gobierno Hulandes pa haci documentonan di e caso aki publico (WOO-verzoek), pasobra durante e proceso forensico cu a wordo haci na Aruba, un instancia Hulandes tabata involucra. Aunke no tur documento a wordo entrega, e informacion cu a surgi a mustra cu tabatin problema serio di comunicacion entre Aruba y Hulanda, cu a contribui na e atraso di e investigacion.
Den e proceso pa sigui e desaroyonan di cerca, sr. Villegas a bay corte na Hulanda despues cu Ministerio di Husticia Hulandes a rechasa di duna/ publica cierto documento. Durante e proceso aki, sr. Villegas a tuma nota cu e caso a bolbe cuminsa move, y un investigacion nobo a wordo habri. Pero e corte a determina cu no tabatin suficiente prueba pa condena e sospechoso cu Ministerio Publico tabata kier a persigui. Segun e documentonan cu a surgi te cu awor, tabatin evidencia cu durante e investigacion original hopi material a perde, incluso documentonan y pruebannan forensico, y e dossier no tabata completo.
Sr. Villegas a enfatisa cu su intencion principal ta pa sigui pidi atencion pa husticia pa Poentje Castro: “E crimen aki no ta solamente un tragedia personal, sino un golpi pa libertad di prensa na Aruba. Si un periodista por wordo mata y despues di dies aña ainda no tin husticia, kico e mensahe ta pa esnan cu kier sigui haci periodismo critico?”
Raad van State tabata hopi critico riba e manera cu e Ministerio di Husticia a maneha e caso, y ta spera cu e documentonan di Nederlands Forensisch Instituut (NFI), incluso e analisis di e Poentje Castro su BlackBerry cu ta contente e ultimo mensahenan cu el a ricibi, y pruebannan forensico di e sitio di crimen cu ta inclui paña cu mancha di sanger, lo por finalmente wordo publica. Na e momentonan aki ta den espera pa e uitspraak di Raad van State aki seis siman, sr. Villegas a termina bisando.
