Partido MAN-PIN ta vigilá di aserka e situashon di preokupashon profundo i polítikamente
delikado ku a surgí na Venezuela despues di elekshon di 28 di yüli último. Venezuela ta di
importansia familiar, históriko, kultural i sosio-ekonómiko grandi pa Kòrsou. Komo ehèmpel
por menshoná e efekto di sanshonnan Europeo i Merikano riba Venezuela ku ta un di e
kousanan ku a pone ku nos no por a siguí refiná zeta.
Nos ta mira e efektonan riba nos merkado laboral, nos situashon di bibienda, nos gastunan
di salubridat públiko i gastunan pa sektor di imigrashon i hustisia debí na un kantidat grandi
di personanan no dokumentá ku a hui pa e situashon ekonómiko malu di nan pais.
Komo pais bisiña partido MAN-PIN su posishon ta pa Kòrsou keda un zona di pas i pa sigui
vigilá e desaroyonan di aserka. P’esei for di un kuadro di zona di pas, MAN-PIN ta urgi
Gobièrnu di Kòrsou(Gabinete Pisas) pa hasi un yamada den Reino i alabes na Venezuela pa
garantisá pas den e pais i pa permití un ouditoria independiente di e resultadonan di
elekshon ku apoyo internashonal. Na mes momento pa garantisá derechonan humano i pas
sivil na Venezuela.
MAN-PIN ta enfatisá e importansia di esaki basa riba e lasonan familiar, históriko i kultural,
ku nos tin ku Venezuela i konbibensia ku e pueblo venezolano na Venezuela i na Kòrsou ku
ta forma parti di nos komunidat i ku ta anhelá pa pas i trankilidat den nan pais.
Finalmente, na opinion di MAN-PIN, Gobièrnu di Kòrsou komo pais outónomo mester
ekspresá su posishon den e situashon di urgensia ku a surgi na Venezuela.
Man-Pin ta boga pa pas i trankilidat na Venezuela
