Marinirnan di Eskuadron di Marina Karibe (MSC), prosedente di Aruba, a forma parti di un ehersisio ku a dura tres siman ku e nòmber ‘Caribbean Urban Warrior’ (CUW). E ehersisio a tuma lugá na Camp Lejeune, na North-Carolina, kaminda tin e Kuerpo di Marina di Estado Unídos (United States Marine Corps (USMC). Durante e Caribbean Urban Warrior e Marinirnan di Eskuadron di Marina Karibe a trein pa yega e nivel di eskuadron den un zona urbanisá, ku yudansa di eksploradornan Merikano, den bastante lugá di ehersisio realístiko.
E ehersisio Caribbean Urban Warrior tabata prinsipalmente den e kuadro di Operashonnan Militar riba terenonan Urbanisá (Military Operations in Urban Terrain – (MOUT). Di e forma ei, dunadónan di señal avansá, tiradónan designá, ingenieronan di infantería i esnan ku ta salba bida durante kombate, a realisá un treinen krusá den kolaborashon ku e marinirnan Merikano di e 2o divishon di Infantería di Marina. Nan a trein riba nivel di sekshon den diferente fasilidat ku tabata presente na e kampamentu, manera siudat di kombate, Camp Davis i aldea di treinen Lejeune, i a ehersé vários operashon na nivel di trupa, por ehèmpel un redada anfibio, un emboskada i un atake riba un pista di aterisahe. Banda di e Marinirnan di Aruba un peloton di boto di Kòrsou i e destakamentu di Marina di Sint Maarten tambe a partisipá na e ehersisio nan.
Regularmente durante aña Defensa ta trein den Region Karibe huntu ku e Marinirnan Merikano di e 2o Divishon di Marina. E ehersisionan ta tuma lugá tantu na Estádos Unídos komo den region Karibe Hulandes. E kolaborashon aki no solamente ta demostrá e laso estrecho entre ámbos pais i nan unidatnan, pero ta brinda tambe e posibilidat pa interkambiá konosementu i eksperensia. Di tal forma Camp Lejeune ta brinda fasilidatnan estupendo pa kolaborá ku e partidonan i e lokalidat di treinen aki ta sòru ku e Marinirnan di Eskuadron Karibe por trein riba un nivel mas haltu ku lo ta posibel dentro di nan propio lokalidat geográfiko den Region Karibe.
VIDEO CARIBBEAN URBAN WARRIOR : https://youtu.be/Vobq02BTmsc