Fraccion di Movimiento Electoral di Pueblo (MEP) a critica fuertemente un cambio di nota presenta door di Gobierno AVP–FUTURO, cualificando e accion como inconstitucional y dañino pa democracia di Aruba.
Segun MEP, ministernan di e gobierno di coalicion a introduci un cambio di ley despues cu Parlamento ya a aproba e legislacion dialuna ultimo. E cambio a resulta den e eliminacion di un amienda presenta door di parlamentario Mike de Meza di AVP , un propuesta cu anteriormente a wordo aproba cu mayoria di Parlamento.
Fraccion di MEP a indica cu e cambio ta percibi como un intento pa bagatelisa un colega parlamentario y ta representa un practica politico cu no ta saludabel pa un sistema democratico. Pa e motibo aki, MEP no a por bay di acuerdo cu e manera di actua di Gobierno y, como consecuencia, no a vota na fabor di e Presupuesto 2026.
Segun lider di fraccion di MEP den Parlamento, durante e debatenan a wordo observa un actitud negativo no solamente di Minister Presidente, pero tambe di henter coalicion gobernante. E lider a señala cu e tono di e debatenan a refleha tension y confrontacion.
MEP a adverti cu e consecuencia di e decisionnan y practicanan politico aki lo eventualmente afecta e pueblo di Aruba, cu lo experimenta e impacto di lo cu nan a describi como un clima politico negativo.