Konseho Sosial Ekonómiko (SER) Korsou
Ta yama miembronan nobo di SER bon biní
Durante un reunion ekstraordinario di Konseho Sosial Ekonómiko (SER) di Kòrsou, ku a ser konvoká spesialmente pa e okashon i ku a tuma lugá djaweps dia 14 di aprel 2022 den La Belle Alliance na Avila Beach Hotel, a sera konosí ku e miembronan, resientemente nombrá i nan suplentenan. Seis miembro (suplente) nobo lo representá interesnan komersial/empresarial den SER, tres miembro (suplente) nobo lo forma parti di e konseho na nòmber di e sentralnan sindikal huntu ku un miembro independiente nobo.
E representantenan nobo di empresarionan ta sr. Daniel Hodge (miembro), sr. Julián López-Ramírez (miembro), sr. Robbin Martina (miembro suplente), sr. Marcos Cova (miembro suplente), sr. Ralph Ottenheim (miembro) i sr. Wendell Bonafacio (miembro suplente). E representantenan sindikal nobo den SER ta sr. Kenneth Bremer (miembro suplente), sr. Richinel Ilario (miembro) i sra. Adriëla Job-Dirksz (miembro suplente). E miembro independiente nobo ta sr. Royston Sling (hurista i eksperto riba área di penshun).
Durante e reunion introduktorio, e miembronan nobo i nan suplentenan a haña splikashon mas detayá riba funshonamentu di e konseho i tambe riba aspektonan relevante relatá na miembresia di SER. Ademas, a hiba kombersashonnan ku e miembronan aktual di SER riba temanan sosioekonómiko aktual.