Minister di Husticia, Arthur Dowers, a bishita e area hotelero personalmente pa constata e situacion di e asina yama ‘electric steps’ cu a duna hopi di papia ultimamente. E conclusion di e mandatario ta cla y raspa: tur e vehiculonan aki cu ta para riba tereno publico ta ilegal y mester wordo kita mesora.
Durante un conferencia di prensa den e mesun area hotelero, Minister Dowers a elabora riba e problema di e vehiculonan di motor cu ta wordo huur pa turista. E mandatario a enfatisa cu e situacion a bay completamente for di man y cu mester pone un paro na e desordo aki pa garantisa seguridad y cumplimento cu ley.
Prohibicion total riba caminda publico
Minister Dowers tabata hopi specifico den su instruccion: e companianan cu tin un espacio priva pa e stepsnan para, por tene nan eynan, pero ningun hende mag di core cu nan riba caminda publico.
“Core cu e stepsnan aki den areanan publico ta ilegal y ta contra di nos leynan y reglanan na Aruba,” e mandatario a declara, haciendo un yamada directo na e companianan pa retira nan obhetonan for di caminda publico inmediatamente.
Instruccion na Cuerpo Policial
Cuestiona riba pakico no a actua anteriormente, e Minister di Husticia a indica cu polis semper tabata autorisa pa actua contra actonan ilegal, pero pa un of otro rason esaki no a sosode di e manera desea. Sinembargo, despues di un analisis profundo di e situacion actual, a duna instruccion formal pa atende cu e situacion aki debidamente. A duna e companianan un espacio breve pa nan mes kita e stepsnan prome cu autoridadnan actua.
Orden mester reina: UTVnan tambe den bista
E maneho di man duro no ta limita solamente na e stepsnan. Minister Dowers a menciona cu tin un problema serio tambe cu UTVnan cu ta wordo staciona canto di caminda of riba acera.
“Mester tin ordo y tur hende mester respeta e reglanan y leynan di pais Aruba,” Dowers a enfatisa. El a recorda inversionistanan cu esnan cu tin negoshi di UTV mester tin nan mesun tereno adecuado pa para nan vehiculonan, ya cu acera y tereno publico no ta luga pa negoshi priva.
Cu e decision aki, Gobierno kier manda un mensahe fuerte tanto pa localnan, turistanan como inversionistanan: e leynan di Aruba mester wordo respeta pa por mantene e seguridad y e structura di nos area turistico.