Minister di Salud Publico, Desaroyo Sosial y Labor (VSA), Richinel Brug, a presenta varios logro interno di e ministerio durante su prome aña na cargo, den marco di e Programa di Gobernacion 2024–2028.
Segun e minister, fortalece capacidad interno, stabilidad di liderato y bienestar di empleado a wordo trata como prioridad for di cuminsamento, cu resultado visibel den varios iniciativa concreto.
“Mi ta consciente cu nos empleado ta traha bou di presion grandi,” Brug a bisa. “e ta real, pero nos ta sigui traha pa mehora condicion y fortalece e ministerio.”
Stabilidad di liderato
Un di prome paso durante e mandato di Minister Brug tabata e nombramento di un Secretario -General permanente. Segun e minister, continuidad di liderato ta esencial pa un ministerio funciona efectivamente.
“Un ministerio no por funciona bon sin claridad y stabilidad na e nivel mas halto,” Brug a declara.
E nombramento a contribui na mehora planificacion strategico, coordinacion interno y consistencia operacional.
Derecho laboral y siguridad di empleado
Den su prome siman na cargo, Minister Brug a ordena cumplimento completo di e ley di licencia di paternidad, indicando cu derecho legal di empleado no mester warda pa proceso administrativo interno.
Ademas, tur empleado di VSA a ricibi un “Disaster To-Go Bag” como parti di preparacion pa temporada di horcan, pa yuda empleado y nan famia durante emergencia.
Salud mental y bienestar
E ministerio a organisa varios sesion di conscientisacion riba salud mental pa personal y liderato, y tambe a tene un VSA Sports Day pa promove actividad fisico y reduccion di stres.
Fondo tambe a wordo asigna pa asistencia psicologico inmediato pa personal di primera linea. Un Recovery Room cu sillon di masage y area pa relax a wordo crea, cu ta planifica pa ta completamente operacional na december 2025.
Entrenamento y herramienta digital
Pa fortalece experencia interno, VSA a lansa un programa di Entrenamento na Redaccion Legislativo y Desaroyo di Politica. Cinco empleado di inspeccion a completa entrenamento BavPol y ta warda nan ceremonia di huramento hunto cu Ministerio di Husticia.
Fondo adicional a wordo asigna pa programa educativo relaciona cu maneho publico, y tur empleado a ricibi laptop pa facilita trabou tanto na oficina como remoto.
Reconocimento di personal y fortalecemento di inspeccion
Durante e aña, VSA a tene dos evento di aprecio pa Personal, reconociendo empleado activo, sirbido publico di hopi aña,hubileo y e rol di personal durante pandemia di COVID-19.
Cu sosten di TWO y Departamento di Salud Publico, fondo a wordo asegura pa fortalece e inspector di VSA y mehora control y servicio.
Planificacion strategico y capacidad legal
E ministerio a prepara un documento di “State of Affairs” cu ta duna un bista general di e situacion actual y prioridad pa e proximo cinco aña.
Despues di salida di e unico experto legal, VSA a restaura su capacidad legal cu adicion di un sirbido publico legal y sosten legislativo pa e proximo añanan.
“Tin un gran falta di experto legal y legislativo den gobierno,” Brug a bisa. “Sin esaki, bon politica no por bira ley.”
Innovacion y entrenamento na AI
Mirando pa dilanti, VSA ta finalisando un acuerdo pa entrenamento na Inteligencia Artificial (AI) pa personal den prome kwartaal di 2026. E iniciativa ta apunta pa mehora eficiencia, maneho di carga di trabou y capacidad digital.
E ministerio tambe tin e meta pa bira un lider den implementacion di AI den gobierno.
“E entrenamento aki ta pone nos personal cla pa futuro y ta pone VSA na prome liña di modernisacion,” Brug a declara.
Mirando pa futuro
Minister Brug a reconoce cu ainda tin reto manera falta di personal y carga halto di trabou. El a reafirma su compromiso pa fortalece moral di empleado, planificacion di personal, bienestar, balansa trabou -bida y legislacion pa beneficio special pa personal.
“Mi ke gradici tur empleado di VSA pa nan dedicacion y perseverancia,” Brug a bisa. “Boso trabou ta esencial pa sirbi nos comunidad.”
Segun e ministerio, e enfoke riba desaroyo di personal, bienestar y innovacion lo sigui siendo e base pa prestacion di servicio publico di calidad.