Riba 1 di juli 2026, den conmemoracion di e di 163 Aniversario di Abolicion di Sclavitud, Gobierno di Sint Maarten lo presenta e ceremonia oficial di Dia di Emancipacion na Belvedere Plantation riba Oyster Pond Road. E ceremonia oficial lo cuminsa pa 8:00 am y lo termina pa 10:00 am. E programa lo conta cu discursonan oficial, poesia, cantamento y baile cultural, hunto cu tournan informativo y un presentacion historico di Belvedere Plantation.
Tur residente y bishitante di e isla ta invita pa e ceremonia oficial, pero por fabor tene bista cu debi na e espacio limita di stacionamento na e sitio, un servicio special di “Shuttle Bus” lo ta disponibel na e rotonde di Belvedere Residential Housing pa transporta tur asistene bay y bini di e ceremonia.
Cada aña, Departamento di Cultura ta organisa e ceremonia di Dia di Emancipacion na diferente sitio rond di e isla como un medio pa concientisa y uni e comunidad como un solo pueblo pa refleha riba e atrocidadnan y condicionnan inhumano cu nos antepasadonan a experencia. E aña aki, 2026, e conmemoracion di Dia di Emancipacion a wordo haci posible en parte danki na Slavery Memorial Committee y St. Maarten Development Fund, kendenan a colabora cu Departamento di Cultura den cuadro di Ministerio di Ensenansa, Cultura, Hubentud y Deporte.
Belvedere Plantation, cual ta riba e Lista Oficial di Monumento, ta un di nos sitionan cultural y historico mas importante y e ta brinda un escenario apropia pa e evento anual aki. Ta calcula cu e cas principal di Belvedere Plantation a wordo construi rond di aña 1840, y investigacion na e sitio ta indica cu tabatin dos factoria di sucu riba e plantacion, di cual un di nan tabata masha cerca di e cas principal.
Na principio di december 2025, Minister di VROMI Patrice Gumbs Jr. y Minister di ECYS Melissa D. Gumbs a anuncia conhuntamente e finalisacion di e compra di “Belvedere Remainder”, cual ta suma un area total di tera di 288,402 m² (71.3 acre of 28.8 hectarea). E propiedad a wordo dividi den 2 parcela: Belvedere Remainder North y Belvedere Remainder South. E di dos parcela, “Belvedere Remainder South”, cu ta encuandra 158,183 m², a wordo asigna na Ministerio di Ensenansa, Cultura, Hubentud y Deporte.
Minister di Ensenansa, Cultura, Hubentud y Deporte, Honorabel Melissa Gumbs, a declara: “E intencion ta pa sigura cu proyectonan di restoracion ta haya prioridad y cu e desaroyo di Belvedere South ta estrictamente enfoca riba preserbacion y promocion di nos herencia cultural.”
Anualmente, ta conmemora Dia di Emancipacion riba 1 di juli, cual tabata e prome dia di fiesta oficial estableci pa Parlamento di Sint Maarten desde cu el a bira un Pais dentro di Reino Hulandes dia 10 di october 2010. E tema di e aña aki, titula “Buss di chain & free your…”, ta curasha tur persona den nos comunidad pa tuma tempo pa refleha riba e impacto di e sclavitud di pasado y con e experencia aki a afecta nan bida den pasado, presente y futuro.
