Minister di Turismo y Salud Publico sr. Dangui Oduber su meta y vision ta pa sigui innova y haci uso di tecnologianan moderno pa asina facilita servicio y procesonan pa nos biaheronan cu ta bishita Aruba.
Aruba Happy One Pass (AHOP) a bin pa mehora un “seamless travel experience” cual lo bay crea un experiencia mucho mas placentero cu un servicio unico y rapido pa e turistanan cu ta bishita nos isla. E sistema aki a keda reconoci internacionalmente como un solucion caminda biaheronan por demostra nan informacion via un sistema di Facial Recognition, Facial I.D y Digital Travel Credentials (DTC). Ademas, e sistema aki lo elimina rijnan largo, cu lo pone e biaheronan como prioridad y pa asina nan por pasa den un proceso rapido cu ta via un “E-Gate Machine” y esaki ta verifica tur nan credential nan conforme cu immigracion y duana nan rekisitonan.
Ministerio di turismo hunto cu Aruba Tourism Authority (ATA) a ricibi bishita di e CEO di SITA, Heather Dahl y nan “digital travel architect specialist” pa asina test e sistema y evalua e proceso por completo y ta premira cu pa e prome kwartaal di 2024 biaheronan lo por haci uso di e sistema AHOP aki na Aruba.
Minister Dangui Oduber sigur ta orguyoso cu e proyecto di “Aruba Happy One Pass” ta birando un realidad. Aruba un biaha mas lo ta un “trendsetter” y lider den innovacion den Caribe. Biaheronan pa Queen Beatrix Airport pronto ta bay haci uso di un tecnnologia avansa cu ta bay pone Aruba como pionero den innovacion y esaki ta un progreso pa henter e industria di turismo y hospitalidad. Minister Oduber semper a kere den innovacion y ta opta pa sigui desaroya ariba solucionnan y colaboracion pa keda mehora nos producto Aruba.