Relaciona cu e situacion di e yate “Energy” cu ta perdi riba lama desde diasabra, Minister di Husticia mr. drs. Arthur Dowers a duna un declaracion na prensa den cual a sigura comunidad cu ta haciendo tur esfuerso posibel pa localisa e piscadonan.
Instancianan di Gobierno ta haciendo tur esfuerso pa logra haya e piscadonan aki sano y salvo y trece nan bek na tera. Minister Dowers ta lamenta cu politiconan ta haci uzo di un situacion asina delicado pa haci politica locual ta condenabel y inmoral.
Kustwacht ta haciendo tur esfuerso y ta uzando modelonan computarisa maritimo manera e coriente di lama y direccion y forsa di biento pa haci calculacion di mas o menos den cual area e boto por ta, pero te ainda tur intento ta envano. Mientrastanto, no por descarta cu e yate por a sali caba pafo di awanan teritorial di Aruba, pa cual a tuma contacto cu autoridad Colombiano pa duna un man den e buskeda. Minister Dowers ta enfatisa cu Gobierno tin contacto cu autoridadnan internacional pa yuda cu e buskeda riba lama grandi.
Minister Dowers a informa cu Setar a “ping” e ultimo luga na unda a haya señal di celular prome cu e perde contacto y a logra determina e area den cual a cuminsa busca. Kustwacht ta pone gobierno y famianan regularmente na haltura di e ultimo desaroyonan, mientras e trabaonan di buskeda ta sigui intensivamente pa logra haya e piscadonan.
Minister Dowers ta convivi cu e famia y conocirnan di e psicado y ta sigura cu Gobierno ta haciendo su maximo esfuerso pa logra trece e piscadonan bek.