Dia di Himno y Bandera ganado di competencia “Un Rima pa mi Isla”
Dialuna mainta Minister di Cultura tabata di bishita na Arco Iris Kleuterschool, esaki ta relaciona cu entregamento di premio na e klasnan ganado di e competencia pa scolnan preparatorio “Un Rima pa mi Isla” en conexion cu celebracion Dia di Himno y Bandera 2022. E muchanan cu guia di nan docente mester a prepara un rima den nos dushi idioma Papiamento cu e mensahe relaciona cu Aruba su Himno y Bandera. Tur klas di scolnan preparatorio por a participa. E docente a graba su muchanan cu telefoon y a entrega esaki pa por a participa. Na su yegada na e scol Minister di Cultura a wordo ricibi pa docentenan di Arco Iris Kleuterschool y e muchanan a canta un bunita cantica di nan scol. E mandatario a gradici e muchanan y nan docente pa a participa den e competencia y felicita nan pa nan bunita rima cu a resulta ganado, cual e muchanan a presenta tambe na e mandatario. Minister Xiomara Maduro a entrega premio di treat di pizza na klas roos cu a presenta nan rima cu e titulo “Awe dia di Himno y Bandera, nos ta Stop cu Guera” y klas blauw cu nan rima cu e titulo “Aruba dushi tera, orguyoso di nos Himno y Bandera”. Un danki na Urataka Center cu a coopera cu premio pa nos muchanan.
