Den e dianan a haya diferente informacion cu a mira e Parlamentario drs. Marisol Lopez Tromp por lo menos dos dia na Landsrecherche. E instancia aki mes no ta duna informacion. Sinembargo for di fuentenan fidedigno a haya sa cu ta trata aki di investigacion di casonan cu a tuma luga na DIP.
Manera por corda EANews na diferente ocasión a bin ta denuncia maniobranan cu a tuma luga na e departamento aki cu ta bay en contra di un maneho stipula y cu nunca a wordo cambia pa otro maneho. Inclusive na momento cu Lopez Tromp a tuma e ministerio bou cual DIP ta cay, pa algún luna. E maneho legal a keda igual, sin embargo tabata desvia continuamente di esaki y no tabata sigui e regla cu esun cu a haci peticion prome ta haya tereno prome.
A base di denuncianan haci, a cuminsa cu un investigacion cu a wordo cataloga como Aloe y despues a cambia di nomber pa Cucuisa . E lunanan cu Lopez Tromp tabata na mando di DIP, a hiba su maneho sin haci e cambio oficial.
E maneho cu a wordo hiba e tempo ey, y cu a trece disgusto bou di personal ta cu tur cos tabata tuma luga den un circulo chikito di e mandatario, cu e director y e consehero.
E investigación cu tin andando contra e director di DIP tin casi un aña caba andando. Pero loke niun hende por comprende ta cu dia di awe ta: con por ta posible cu tin investigación andando contra e director di e departamento y e ta sinta ainda riba e stoel di director. Na cualkier otro departamento e procedura normal ta cu lo a manda e funcionario cas te ora cu e investigacion ta cla. Lamentablemente e Minister bou di cual e maneho di DIP ta cay awo no ta duna ningun comentario tampoco riba e situacion.
Otro pregunta cu pueblo tin ta con por ta posibel cu ta scucha e Parlamentario como testigo, si den e periodo cu ta bou di investigacion e mes tabata minister tambe. E no a tuma e decision di manda Croes cas. Esaki ta apenas algun di e preguntanan cu e pueblo tin y kier mira cu ta actua riba nan.