E serie di bishitanan oficial di Minister di Husticia mr. drs. Arthur Dowers na Hulanda a sigui cu un encuentro importante cu Hefe di Polis di e Unit Landelijke Expertise en Operaties, sra. Inge Godthelp-Teunissen. E reunion a enfoca riba posicionamento di Interpol den e lucha global contra criminalidad y riba fortificacion di cooperacion internacional, particularmente den e lucha contra crimen cibernetico.
Minister Dowers y sra. Godthelp-Teunissen a dialoga riba e importancia di un acercamento centralisa y strategico pa contraresta e menasa digital, y e rol crucial cu Interpol por eherce den e plataforma di coordinacion global. Den esaki, Aruba ta busca pa fortalece su participacion den e red di informacion y accion colectivo, pa asina eleva e capacidad nacional pa responde na desaroyonan cibernetico.
Minister Dowers a reitera su vision pa un Aruba fuerte, conecta y prepara pa defende su comunidad den un mundo digital cada bes mas compleho.