SocialFeatured

Minister Endy Croes: Un momento historico pa Universidad di Aruba

Un Momento Historico Pa Universidad Di Aruba 1

Universidad di Aruba tin un Rector cu ta carga e titulo di Profesor Prof. Dr. Viola Heutger.

Diamars dia 27 di september, mi tabatin e honor como mandatario di Enseñansa  pa introduci dr. Viola Heutger, Rector di Universidad di Aruba pa lesa su discurso inaugural den cuadro di su nombracion como Profesor Titular den e Catedra de ‘Practica Translinguistico den contexto educativo y ramo profesional. Den e mundo academico aki e acto aki ta conoci como “Laudatio”.

Un di e prome sugerencia y peticion cu mi a ricibi di e Colegio di Supervision di Universidad di Aruba dia mi a keda nombra como Minister di Enseñansa y Deporte, tabata pa conforme e Ordenanza di Universidad di Aruba (LUA), instala un comision cu ta encarga pa institui e catedra aki. Universidad di Aruba a ricibi mi sosten den e proceso aki, pasobra ta trata di un catedra cu tin e mandato pa haci investigacion cientifico riba tereno di, entre otro e uso di idioma den nos enseñansa y con nos lo por adapta nos maneho nacional di uso di idioma pa nos studiantenan por ta hopi mas exitoso; durante di nan estudio y ora nan inicia nan carera profesional. Investigacionnan cu no lo ta mara solamente na Aruba, pero lo extende tambe den nos region.

Nos Universidad ta e brug entre nos scolnan secundario y inicio di un carera profesional. Nos institutonan mester por hiba un maneho di idioma tambe pa por prepara nos studiantenan pa por ta exitoso durante di nan estudio y despues pa inicia nan carera. Nos ta papia varios idioma na Aruba. Na cas, den e sector publico, den sector priva, den nos sistema hudicial y nos industria turistico mester di anfitrionnan pa por representa nos bon. Pesey nos maneho riba tereno di idioma mester ta basa riba datos y mester ta inclusivo. Inclusivo den sentido, cu nos studiantennan mester por haña e espacio pa por domina e materia bon, sin wordo stroba door di un idioma cu e no ta domina hopi bon.

Pa e motibonan aki, como mandatario di Enseñansa mi ta sostene investigacion cientifico riba e tereno aki. Nos mester haña sa cua ta e idioma nan cu nos hoben profesionalnan ta domina, nos mester por predeci e competencianan cu nos prefesionalnan mester tin pa e proximo 10 pa 20 aña pa por visualisa y realisa un desaroyo sostenibel pa nos pais. Tipo di decisionnan aki ta wordo tuma riba nivel nacional y ta un di e responsabilidadnan di un gobierno. Sinembargo, ta esencial cu decisionan di e embergadura aki ta wordo tuma a base di datos cu a wordo colecta pa medio di investigacionnan scientifico.

 

E ocasion aki ta uno historico pasobra pa prome biaha e Rector di nos Universidad di Aruba lo carga e titulo di ‘Profesor’. Prof. Dr. Viola Heutger tin e mandato y ta determina pa sigui cu e trabaonan cu varios experto local a inicia. Dr. Heutger a hiba un discurso riba nivel academico pero alabes uno inspirativo, buscando colaboracion di tur esnan cu tin un rol den nos enseñansa. Prof. Heutger a reconoce varios pionero, entre otro Joyce Perreira, Ramon Dandare y Eric Mijts pa e trabaonan di investigacion cu nan a eherce caba. Investigacionnan cu sin duda lo sirbi e catedra aki tambe. Como Minister di Enseñansa tabata un momento di celebra tambe cu e Rector nan di Universidad di St. Maarten y Curaçao tabata presente pa e occacion aki. Tambe e Rector di Universidad di Utrecht a forma parti di e procesion pa instala Prof. Dr. Viola Heutger. E celebracion riba patio di Universidad tabata un ameno, uno di inclusion cu colaboracion di Trampolin, Sra. Vivian Lampe y Victor Samuel. Un pabien na Colegio di Supervision di Universidad di Aruba, henter e comunidad academico y na comunidad di Aruba en general pa e aceptacion di e catedra aki. Na nomber di Gobierno di Aruba, un pabien na Rector di nos Universidad, Profesor dr. Viola Heutger.

Un Momento Historico Pa Universidad Di Aruba 5Un Momento Historico Pa Universidad Di Aruba 4Un Momento Historico Pa Universidad Di Aruba 3Un Momento Historico Pa Universidad Di Aruba 2

Related posts

Paisnan rond mundo a conoce cifra di Inflacion mas halto door di Pandemia y Guerra

EA News Author

Persona masculino cu no ta duna señal di bida

EA News Author

Parlamentario Alvin Molina (MEP): Mi ta felicita e 40 graduadonan di IBERO American High School

EA News Author

Leave a Comment

Whatsapp Message