Aruba lo entrega tur Aruba su observacionnan final pa
cu e Rijkswet riba supervision financiero prome cu 1 di mei”. Esaki ta e prome
reaccion di Minister di Finansa Geoffrey Wever riba e anuncio di aumento di interes
di parti di Hulanda.
Minister Wever ta splica cu otro siman diamars lo tin un Openbare Bijeenkomst den
Parlamento di Aruba unda Gobierno di Aruba lo duna un splicacion amplio tocante e
status di e refinanciamento. Pero, "mirando cu awe a sali diferente noticia den
medionan di comunicacion referente e refinaciamento di e debenan cu Gobierno di
Aruba tin cu Gobierno di Hulanda, mi kier a reacciona di awo brevemente".
E acuerdo entre Gobierno di Aruba y Gobierno di Hulanda di 4 di juni 2024 ta stipula
cu 1 di mei 2025 e rijkswet riba supervision financiero mester ta entrega na Tweede
Kamer. Inicialmente Gobierno di Hulanda y Gobierno di Aruba no a jega na un
entendimento riba e rijkswet riba supervison financiero, y e ora ey e dos paisnan a
acorda cu e interes riba e prestamo di Afl. 916 miyon cu Hulanda a duna Aruba
durante Covid lo carga un interes di 6.9%; un interes mas halto cu Aruba ta paga riba
su debenan riba mercado local y riba mercado internacional. Despues Gobierno di
Aruba y Gobierno di Hulanda a sigui negocia y a yega na un entendimento
preliminario cu entre otro (i) Hulanda lo refinancia e debe di Aruba riba mercado
internacional y (ii) lo reduci e interes di 6.9% pa 5.1%, y despues na mas o menos 3.2%,
bou di e condicion cu e rijkswet riba supervision financiero mester drenta. Tambe a
palabra cu si e rijkswet no a wordo entrega promer cu 1 di mei 2025 na Tweede
Kamer, e interes di 5.1% riba e prestamo di Afl. 916 miyon lo subi back na 6.9% te ora
e rijkswet drenta na vigor, cu ta mas halto cu e interes cu Aruba ta paga riba
mercado local y internacional.
Desde cu Gobierno AVP-FUTURO a huramenta, 4 siman pasa, riba 28 maart ultimo,
Gobierno a sigui traha cu Hulanda pa finalisa e proceso di negocacion y a instrui e
team negociador pa percura cu tur documento di banda di Aruba mester ta entrega
na Hulanda promer cu 1 di mei 2025 pa asina Aruba a keda cla cu e parti inhoudelijk.
E mensahe aki tambe a duna Hulanda na algun ocacion, cu e speranza cu Hulanda
lo ta dispuesto pa no ahusta e interes per 1 di mei proximo, cu no ta den interes di
Aruba, tambe mirando cu e Staatsecretaris Szabo ta pone prioridad riba
“zelfredzaamheid” di Aruba. Te cu awor lamentablemente Staatssecretaris Szabo a
indica cu e no lo desvia di e acuerdo di 4 di juni 2024.
"Gobierno di Aruba ta tratando na diferente manera pa convence Hulanda cu e
tardanza no ta culpa di Aruba, y cu den acuerdo cu Hulanda, a haci peticion na IMF
pa un rapport relaciona cu e normanan cu lo stipula den e rijkswet, cual a tuma mas
tempo cu a calcula na prome instante. Aruba lo percura pa entrega su parti prome
cu 1 di mei proximo y otro siman Gobierno di Aruba lo duna un splicacion amplio den
Parlamento di Aruba, pa asina pueblo di Aruba por haya un bista completo di e
proceso” – Minister Geoffrey Wever.