Gremionan Comercial, AHATA, CUA, y ATIA, a tuma nota cu Gobierno di Hulanda ta hisando
interes riba Aruba su debe di AFL 900 Miyon, pa motibo cu Aruba no a cumpli ainda cu un ley
nobo di Reino relaciona cu supervision financiero. Segun acuerdo existente, pa 1 Mei e ley
nobo mester ta entrega na Tweede Kamer y indicacion ta cu ainda dialogo ta tumando lugar
entre Aruba y Hulanda riba e texto di ley.
E gobierno anterior ya a nenga e oportunidad pa logra un interes abao di 3.4%. Resultado di e
decision tabata un interes hopi mas halto di 5.1%, cu ta gasto grandi adicional pa Aruba.
Awor cu gobierno actual no a cumpli ainda cu e acuerdo cu Hulanda, e interes lo por subi mas
ainda na 6.9%.
Ademas tin debe internacional di casi AFL 434 Miyon, cu tambe lo por a refinancia via Hulanda
na un interes mas abao si logra cumpli cu e acuerdo.
E gasto adicional di e diferencia entre interes di 3.4% y 6.9% ta un total di AFL 268 Miyon.
CUA, ATIA y AHATA, como representante di dunador di trabao y bos pa sector priva, ta
considera e interes mas halto como desperdicio di fondonan publico cu nos comunidad ta traha
duro pa genera pa nos aparato gubernamental.
Ta urgi nos gobierno pa evita e fayo financiero y finalisa e proceso cu Hulanda pa e ley nobo di
supervision financiero di nos pais.
ATIA, CUA Y AHATA ta desea pa gobierno evita desperdicio di fondo publico
