Oportunidadnan nobo di financiamento ta trece oportunidadnan nobo pa restauracion
Riba diahuebs, cual ta e dia cu Minister Maduro ta reserva pa reuni riba Cultura, e mandatario a reuni cu Stichting Monumentenfonds Aruba (SMFA) riba desaroyonan den e mundo di monumento.
Den e encuentro cu e directora di SMFA, sra. Anne Witsenburg, a elabora riba oportunidadnan nobo pa financiamento cual lo trece oportunidad pa restauracion di monumentonan priva. Tambe a toca riba webinar di 30 mei organisa pa e Dutch Caribbean Heritage Platform unda cu tin oportunidad pa den colaboracion y combersacion cu e otro pais den Reino Hulandes por papia riba e diferente retonan cu e mundo di monumento y su respectivo restauracion ta enfrentando. Na fin di e reunion, Sra. Witsenburg a entrega e relato anual di 2021 na e Minister di Cultura.
Minister Maduro ta satisfecho cu e desaroyonan cu tin y ta spera di wak mas oportunidad sali for di e desaroyonan aki cual ta beneficioso pa e preservacion di e monumentonan di nos Pais.
