Local

Minister Maduro di Cultura ta invita Pueblo pa haya sa mas di ken nos ta den e exposicion ‘Diaspora Arubiano’ na Archivo Nacional Aruba

Whatsapp Image 2023 03 23 At 7.41.35 Am

Riba Dia di Himno y Bandera, Minister Maduro di Cultura a bishita Archivo Nacional Aruba ANA pa asina por cera conoci cu e exposicion nobo di ANA, titula ‘Diaspora Arubiano.’  Un exposicion den cual ta brinda un bista historico di ken e Arubiano ta y den cual a traves di un liña di tempo por mira e influencia cu e desaroyo economico tabata tin riba e constelacion di nos poblacion na Aruba. Desaroyo economico di Aruba a trece cune cu persona di varios Pais a bin yuda cu mano di obra y a haci Aruba nan hogar pa semper. Den e exposicion por mira, por ehempel, cual ta e origen di e famnan cu awe ta conoci como famnan di famianan Arubiano.

Den cuadro di e aña den cual ta conmemora e di 160 aña di abolicion di sclavitud den Reino Hulandes, ANA a inclui den e exposicion ‘Diaspora Arubiano,’ arte y informacion riba e historia di sclavitud na Aruba tambe. Un parti di nos historia cu no ta mucho conoci, pero cu yudansa di e digitalisacion di archivonan colonial nos ta haya sa mas di dje.

Pa conmemora nos Dia di Himno y Bandera, ANA a expone tambe algun di e 600 pintura cu tabata e resultado di e concurso cu a wordo haci pa por a yega na e diseño pa e Bandera di Aruba na 1976. Den e seccion aki di e exposicion ‘Diaspora Arubiano,’ tambe por admira un di e banderanan cu a wordo hisa dia 18 di maart 1976 na Wilhelmina Stadion.

Minister Maduro di Cultura ta gradici ANA pa a traha den tempo record riba e bunita exposicion aki. E mandatario ta invita Pueblo pa bishita ANA pa asina haya sa mas di ken nos ta. ‘Trece nos hobennan pa asina nan por haya sa ken e Arubiano ta y con Aruba a desaroya su mes. Conoce bo pasado, pa bo por compronde bo presente y pa bo por fiha bo futuro,’ ta palabranan di Minister Maduro di Cultura como invitacion pa cera conoci cu e exposicion nobo di ANA, ‘Diaspora Arubiano.’

Whatsapp Image 2023 03 23 At 7.41.38 AmWhatsapp Image 2023 03 23 At 7.41.36 AmWhatsapp Image 2023 03 23 At 7.41.34 Am 2Whatsapp Image 2023 03 23 At 7.41.38 Am 2Whatsapp Image 2023 03 23 At 7.41.36 Am 2

Related posts

Pronostico di tempo diamars 31 di mei 2022

EA News Author

Minister xiomara maduro a sera conoci cu sr. Hilbers cu ta e executive director nobo pa reino hulandes na imf

EA News Author

Decisionnan tuma pa Gobierno relaciona cu e Crisis di Corona Virus COVID- 19

EA News Author

Leave a Comment

Whatsapp Message