E siman aki sr. Adolf ‘Dufi’ Kock a ricibi e bunita reconocemento di un Zilveren Anjer di Het Prins Bernhard Cultuurfonds fo’i man di Su Alteza Real Princesa Beatrix. Dufi a ricibi e reconocemento aki pa su aporte importante na cultura di Aruba. Pa varios aña caba Dufi como escritor y historiado ta dedica na investiga y documenta historia di nos Pais, specialmente e rol di Aruba den e segunda guera mundial. Dufi ta comparti e informacion valioso aki den su publicacion nan y tambe ta yuda hopi hoben na momento cu nan mester mas informacion pa haci nan charla na scol.
Minister Maduro ta felicita y ta gradici Dufi pa tur e esfuerso cu Dufi ta haci pa documenta historia di Aruba. Den cuadro di Siman di Archivo, Minister Maduro ta gradici Dufi tambe pa ta un persona cu ta percura pa archiva y comparti hopi informacion valioso pa nos formacion como cuidadano di Aruba.
