Minister Pisas a delinea trayecto pa rescata nos coralnan y pa garantisa cu pueblo tin suficiente pisca den futuro

Recientemente Minister di Asuntonan General encarga cu sector di Agricultura, Medio Ambiente y Naturalesa señor Gilmar Pisas tabatin un encuentro importante cu cientifico maritimo dr. Mark Vermeij.

Durante e encuentronan a elabora entre otro riba atendementu cu e malesa di coralnan na cierto parti di Corsou, maneho pa evita deteriora di nos coralnan y pa garantisa cu tin suficiente pisca pa pueblo di Corsou awor y den futuro y pa mantene e producto turistico di buceo. Pa mantene tur esaki ta di sumo importancia pa nos tin un maneho di ocean efectivo cu sosten di tur stakeholder.

For di comienso Minister Pisas a mustra interes pe topico importante aki cu hasta minister a bay sambuya hunto cu dr. Vermeij pa personalmente tuma nota di e malesa di coral cu mester atende y otro aspectonan maritimo cu ta rekeri atencion. Tambe minister tabatin varios encuentro cu diferente stakeholder.

Esencial ta cu mester keda mantene nos coralnan y evita deteriora. Aspecto importante den esaki ta presencia di e pisca Gutu (Papegaaivis). Gutu ta un pisca importante dor cu e yuda mantene e coralnan sano y consecuentemente ta aporta pa e playanan keda cu e caracteristica di santo blanco. Ultimo añanan varios playa a disparce na algun isla pa motibo di mal condicion di e coralnan y ausencia di e pisca Gutu. Nan ta herbifero cu ta morde coral y come lima y saca esaki bek como desperdicio den forma di santo blanco. Gutu su manera di come ta importante pa produccion y distribushon di santo y ta preveni crecemento di alga cu ta cubri y mata di coral.

Practicamente tur isla den Caribe ya ta tumando medidanan necesario pa evita malesa di coral y di piská pa asina rescata nan costa y mantene calidad di lama. Durante henter e trayecto aki Minister Pisas a keda asisti pa sr. Faisal Dilrosun di Ministerio di GMN cual alabes ta facilita contacto cu e stakeholders y dr. Mark Vermeij. Dr. Mark Vermeij ta un cientifico afilia na Carmabi cu a haci varios investigacion cientifico maritimo na Corsou. E ta alabes Profesor di Ecologia Tropical Marino na e departamento di Ecologia di awa dushi y maritimo na Universidad di Amsterdam. Pronto Minister Pisas lo duna mas informacion tocante di e topico aki den un rueda di prensa.