Den cuadro di e decreto di luna di Adulto di Gabinete Wever-Croes II, Minister Arends a reconoce dos Adulto Mayor, Sr. d’Arnauld y Sr. van Niel, cu pa hopi aña a aporta na e bienstar di nos Adultonan Mayor na Aruba. Ambos persona ta dos baluarte cu a aporta pa hopi aña den diferente area social, deporte y como profesional na Aruba, especialmente pa nos Adulto Mayor.
Sr. Eric d’Arnauld, na aña 1983, ta co-fundador di Club Kibrahacha 60+. Sr. d’Arnault a forma parti di e directiva di e fundacion pa mas di 20 aña di cual hopi aña a ocupa e puesto di presidente den e directiva di Club Kibrahacha. Den otro area social Sr. d’Arnault tabata tambe co-fundador di Aruba Scholarship Foundation y ta miembro honorario Aruba Rotary Club. Pa 23 aña Eric tabata consul di Mexico na Aruba. Eric d’Arnault ta bon conoci tambe den e mundo di Car dealers. Desde 1969 te cu 1999 sr. d’Arnault a maneha entre otro ArubaCar NV, Topcar NV y Jolley Holding NV. Sr. d’Arnault pa varios aña a forma parti di e directiva di Camara di Comercio, Banco Central di Aruba. Den area di deporte Eric a practica e deportenan di baseball, tennis y golf.
Sr. Paul van Niel, pa 13 aña, a maneha e Organisacion di Pensionado Publico di Aruba (OPPA) como presidente di e organisacion. Sr. Paul van Niel ta bon conoci tambe na Aruba pa hopi aña como director di skol di ofishi John F. Kenedy. Na aña 1984 despues cu Sr. van Niel a baha cu pensioen, ela maneha Boekhandel Mariska pa 18 aña largo. Sr. van Niel tabata un bon deportisata cu a practica deporte di tennis y landamento. Ela contribui tambe den nos deporte local door di forma parti di directiva di Arubaanse Zwembond y Aruba Lawn Tennis Bond.
Minister Arends durante un encuentro ameno hunto cu famia y dirigentenan di diferente organisacion di Adulto Mayor: OPPA, Club Kibrahacha, Grupo Nucleo, St. Cas Mari, St. SABA a hasi entrega di un pin como reconocimento na ambos baluarte. Sr. Eric d’Arnault a wordo representa pa su yui muher Natasha d’Arnault. Minister Arends tabata tin e honor di por a conoce ambos baluarte cu a contribui na dos diferente organisacionan pa nos Adultonan Mayor cu tin mas di 30 aña di excistencia estableci na Aruba.
Minister Ursell Arends, encarga cu e cartera di Adulto Mayor, ta preparando un maneho integral pa atende cu e nececidad grandi cu tin pa mehora e calidad di bida di nos Adultonan Mayor na Aruba. Den su maneho, minister Arends ta compromete pa mehora e calidad di cuido y bienestar di adultonan mayor, stimula mas participacion den comunidad y alabes cu un meta special pa nan keda biba mas largo den un propio ambiente.
Pa realisa esaki lo rekeri pa traha hunto cu nos Adultonan Mayor, profesionalnan y boluntarionan”, Minister Arends a subraya. E ta conta ariba cooperacion di tur persona cu kier aporta na su maneho sostenibel y duradero pa nos Adultonan Mayor y pa Aruba.
