E rijbewijsnan concerni lo ta valido te cu 31 di december 2020
En conexion cu e Corona-virus COVID-19, na maart 2020 minister di Husticia mr. Andin Bikker a introduci un maneho temporal pa cu renobacion di rijbewijs, den cuadro di articulo 9, prome seccion (‘eerste lid’), di e Landsbesluit rij- en keuringsbewijzen (AB 1999 no. 61). A base di dicho seccion di ley un rijbewijs normalmente por wordo renoba dentro di un aña cu ela caduca, si e unico motibo ta cu e periodo di validez a expira.
Considerando cu e situacion excepcional menciona dor di COVID-19 ainda ta perdura y a trece retraso inespera den introduccion di un rijbewijs nobo, minister Bikker a dicidi pa prolonga e maneho temporal a base di cual rijbewijs cu un fecha riba cual e rijbewijs a (of lo bay) vence entre 16 di maart y 30 di december 2020, lo wordo considera como un rijbewijs valido pa maneha vehiculonan di motor na Aruba te cu 31 di december 2020, pa un of mas categoria menciona den e rijbewijs concerni.
E maneho temporal menciona ta aplicabel pa rijbewijs cu normalmente lo por wordo renoba a base di seccion uno (‘eerste lid’) di e articulo 9 menciona, y pa por stuur vehiculonan na Aruba, no den exterior.
Si circunstancianan mehora, e maneho lo wordo adapta, observando un periodo di transicion.