Minister Ursell Arends: Tin ley cu ta proteha naturalesa y den e caso di Embassy e Natuursbeschermingverordening a prevalece

Na Aruba tin regla y procedura cu ta conta pa tur hende. Ley tambe ta proteha naturalesa, specificamente e Natuurbeschermingsverordening. Minister di Naturalesa, Sr. Ursell Arends a tene un conferencia di prensa pa elabora riba e procedura y e diferencia entre un ‘aanlegvergunning’ y ‘ontheffing’. 

Minister Arends a cuminsa na splica con e procedura mester a cana, cual ta menciona cu tur proyecto cu impacto riba naturalesa mester un ‘ontheffing’. E ‘aanlegvergunning’ ta duna permiso pa haci algo, den e caso aki pa construi por ehempel. E ‘aanlegvergunning’ ta condicional na ‘ontheffing’ cual por ehempel ta tene cuenta cu especienan den nos naturalesa cu ta protehi y den e caso di Embassy tres marine bioloog a constata banda di e yerba di caña, diferente coralnan den e beach cu a pidi ‘aanlegvergunning’ p’e cual ta nifica cu e hecho ta cu Natura N.V. mester un permiso di excepcion(ontheffing). 

‘Ontheffing’ ta wordo duna door di e Minister di Naturalesa. Segun Natura, ‘ontheffing’ no ta conta pa nan, huez a dicta cu si. A splica tambe cu e ‘aanlegvergunning’ di Natura ta “voorwaardelijk” cual ta nifica cu sin ‘ontheffing’ e no ta valido. 

Dia 6 di juli, Minister a tene un reunion cu Natura y for di e desaroyador su banda a indica cu nan lo pidi ‘ontheffing’ solamente si Gobierno di Aruba garantisa cu e ta wordo aproba, esey no ta aceptabel y a wordo rechasa. Durante e mesun reunion, Minister Arends a propone un solucion cual ta encera pa desaroya e beach na banda pazuid, e propuesta a wordo rechasa retundamente y Natura a scohe pa corte y publicidad. 

Den transcurso di siguiente simannan email a drenta cerca ministerio unda ta menasa cu un caso di daño y perhuicio contra Gobierno di Aruba, cual tampoco ta aceptabel mirando cu cualkier perdida di Natura ta resultado di consehonan legal ekiboca. “E pregunta critico den e caso aki e ora ta bira, kende a crea e impresion cu Natura unda nos lo por “fix” e permisonan aki?”, Minister Arends ta reacciona.   

Pa termina e conferencia di prensa Minister Arends ta enfatisa cu e intencion no ta pa stroba desaroyo na Aruba, si no pa crea un desaroyo sostenibel cu lo beneficia nos bek den futuro. Esaki ta un precedente cu a wordo poni. Desaroyo no por cana su caminda independientemente di naturalesa. 

Comunicado Minister Ursell Arends