Durante di un encuentro na Haagse Hogeschool a tuma lugar un presentacion di un grupo di studiante di “Minor Koninkrijkszaken”. Presente tabata Minister Plenipotenciario mr. Ady Thijsen y directora di Arubahuis mr. Joselin Croes. E grupo di studiantenan a tene un presentacion riba nan “adviesrapport” cu tin como titulo “Verbonden blijven – weg terug naar Aruba”. Esaki tabata un encargo di Arubahuis y e studiantenan cu a traha riba e encargo aki tabata Jort van Poeteren, Raymon de Jong, Dannah Geerman y Nora Korevaar. “Minor Koninkrijkszaken” ta parti di e facultad “Bestuur, Recht en Veiligheid” di Haagse Hogeschool.
Meta di e encargo tabata pa bin cu instrumentonan con Arubahuis lo mester engrandese e lasonan cu e grupo di studiantenan Arubiano na Hulanda. Pa e rapport aki nan a entrevista studiantenan Arubiano y esaki a conduci na recomendacionnan pa con por logra yega na mihor contacto cu e studiantenan. Un di e sugestionnan ta pa haci mas uso di rednan social. Actualmente Arubahuis ta hopi activo riba Facebook, pero lo mester expande esaki door di haci mas uso di por ehempel Instagram y linkedln, cu ta rednan social cu ta hopi usa bou di hobennan. Tambe a bisa cu lo ta bon pa amplia e guia di studiantenan door di e studiementor pa henter nan estudio. Awor aki e studiantenan ta haya guia di un studiementor unicamente den nan prome aña di estudio. Otro punto cu a bin padilanti ta lo mester organisa mas encuentronan cu studiantenan y asina Arubahuis lo por keda den contacto y den dialogo cu nan.
Minister Thijsen a gradici e grupo di studiantenan pa nan rapport y a bisa cu tin hopi recomendacionnan cu ta hopi util y importante pa Arubahuis por fortalisa e lasonan cu nos studiantenan. E “adviesrapport” aki ta un comienso y e ta duna indicacion cu mas investigacion na e situacion di studiantenan na Hulanda ta na su lugar. E mandatario a para keto na kico ta e efecto di tin bon relacion y tin bon bista riba e grupo di studiantenan Arubiano na Hulanda. Minister Thijsen a bisa cu ta importante pa traha riba maneho pa stimula nos studiantenan pa regresa Aruba despues di nan estudio. Segun e mandatario esaki ta di suma importante, pasobra door di e “vergrijzing” – e candidad di personan cu lo bai cu pensioen – Aruba lo mester di hopi trahador pa mantene e nivel e crecemento economico acual. Sr. Thijsen ta kere firme cu esaki ta e momento pa stipula maneho pa yena e cuponan di trabao aki cu nos mesun hendenan. Un bon forma pa logra esaki lo ta un Acuerdo Social entre Gobierno y gremionan sindical y gremionan commercial (partnernan social).
E potretnan ta cortesia di Arubahuis
