E luna akí i luna di mei, empleadonan di e departamento di Salubridat Públiko ta den bario pa pasa habitantenan di bario un angua kontra corona i di buster sin sita. E departamento tin bon eksperensia ku pasamentu di angua den bario. Habitantenan di bario ku difísilmente por bai Kompleho Deportivo Jorge Nicolaas, ta hasi bon uso di pasamentu di angua pegá ku kas.
Na Boneiru a kita e medidanan di corona, pero ta keda importante pa ta bon protehá kontra kontagio ku e vírùs di corona. Riba e dianan ku ta pasa angua, mucha, tiner, adulto i hende grandi por pasa e promé i di dos angua kontra corona den bario. E angua di buster ta disponibel tambe den bario pa hóbennan den e edat di 12-18 aña. Generalmente efekto di e anguanan kontra corona ta bira ménos despues di un par di luna. P’esei ta bon pa despues di dos angua kontra corona pasa e angua di buster tambe.
Eksperensia ta siña ku e angua di buster ta duna ménos protekshon despues di tres luna. Pa e motibu ei, departamento di Salubridat Públiko ta konsehá pa pasa un di dos angua di buster. Esaki ta spesialmente importante pa hendenan ku un salú vulnerabel manera hende grandi òf personanan ku un enfermedat grave ku ta bou di tratamentu di un spesialista.
Esaki ta e skema di e dianan ku empleadonan di departamento di Salubridat Públiko ta pasa angua den bario.
26 di aprel 2022 Sentro di bario Tera Kòrá
- 27 di aprel 2022 Ofisina bieu di dòkternan Castro, Rincon
- 29 di aprel 2022 Sentro di bario Nort’i Saliña
03 di mei 2022 Sentro di bario Amboina
- 04 di mei 2022 Ofisina bieu di dòkternan Castro, Rincon
- 05 di mei 2022 Sentro di bario Antriòl, Plasa Chicu Goeloe
Habitantenan di Amboina, Antriòl, Nort’i Saliña i Tera Kòrá por pasa e anguanan kontra corona i e angua di buster di 10:30 – 13:00 den nan bario. Na Rincon habitantenan por pasa e anguanan di 10:00 – 13:00.
