Minister di Enseñansa, Cultura, Hubentud y Deporte, Su Excelencia Melissa Gumbs, a ricibi un bishita di cortesia di National Restoration Fund (NRF), representa pa CEO Sr. Ugur Ozcan y CFO Sr. Coen Reinders. Durante e bishita a discuti varios topico, incluyendo proyectonan actual cu ta andando na Sint Maarten, maneho di NRF tocante patrimonio y preservacion di monumento, y e posibilidadnan pa NRF apoya iniciativanan futuro di e Ministerio di Enseñansa, Cultura, Hubentud y Deporte.
Minister Gumbs a discuti tambe e adkisicion recien di Belvedere Plantation South y e plannan potencial cu ta inclui restauracion di e cas principal y e edificionan rond di dje riba e propiedad cu ta cubri mas di 125,000 meter cuadra. Den su combersacion cu NRF, Minister Gumbs a splica mas detalladamente su vision pa e propiedad, cual ta inclui e posibilidad di haya acceso na fondonan pa desaroyo di un parke cu lo ta auto-sostenibel y lo sirbi como un espacio berde pa destaca y proteha e cultura y patrimonio di e pais. Ta intencion di e Minister pa hiba e discusionnan aki mas leu cu NRF y otro canalnan di financiamento.
National Restoration Fund (www.restauratiefonds.nl) a indica cu actualmente nan ta involucra den e proyecto di restauracion cu ta tumando lugar na e monumento Pasture Piece, situa na #105 LB Scot Road. Pasture Piece ta un di e 50 propiedadnan cu ta aparece riba e Lista di Monumento di Sint Maarten. El a wordo construi den principio di añanan 1900 y awor ta hospeda un Bed & Breakfast, museo y espacio pa evento. Cu raisnan cu ta remonta na e famia Van Romondt y e plantacion di sucu Retreat Estate, cada skina di Pasture Piece ta conta un storia—uno di cultura, resiliencia y elegancia Caribense. Pa mas informacion bishita www.pasturepiecesxm.com. E bishita di cortesia a conclui cu un bishita na e sitio mes di Pasture Piece.
